Kab zrabić prapanovu dziaŭčynie, chłopcu z Horak pryjšłosia prasić dazvołu ŭ rajvykankama
U piatnicu, 12 kastryčnika, na Centralnaj płoščy Horak Viktar Vasileŭski zrabiŭ niezvyčajnuju prapanovu Linie Makar. Źniaŭ rolik, pakazaŭ videa na samym vialikim u horadzie ekranie, zamoviŭ piarścionki dla zaručyn. Padrychtoŭka była tajemnaja, kab niaviesta ni pra što nie zdahadałasia, paviedamlaje horki.info.
— My aboje ź Biarozy, što ŭ Bresckaj vobłaści. Žyli tam niedaloka adzin ad adnaho, ale paznajomilisia tolki tut, u BDSHA. Ja byŭ na apošnim kursie, a Lina tolki pastupiła. Ubačyli adno adnaho i nie zmahli rasstacca. Siońnia ja zrablu prapanovu najlepšaj dziaŭčynie na śviecie, samaj lubimaj, — raspavioŭ Viktar.
Usio pačałosia a 17:00. Da hetaha času Lina sa svaimi siabrami pryjšła na płošču. Dziaŭčyna dumała, što budzie niejki siurpryz, ale prapanovy nie čakała.
Vielizarny ekran pačaŭ «pryznavacca ŭ kachańni» Linie, jana ŭbačyła tam siabie i svajho chłopca.
Tym časam Viktar cichieńka padychodziŭ da ździŭlenaj kampanii. Rolik skončyŭsia, Lina paviarnułasia i ŭbačyła svajho chłopca z bukietam, u biełaj kašuli i ź miatlikam. Viktar zrabiŭ prapanovu i padnios kachanaj piarścionak.
Para źbirajecca zhulać viasielle letam abo ŭvosień nastupnaha hoda, a pakul buduć da jaho pavolna rychtavacca.
Cikava, što dla takoj spravy žanichu pryjšłosia prasić dazvołu ŭ rajvykankama.
— Adrazu źviarnuŭsia da kamunalnikaŭ, — uspaminaje małady čałaviek u materyjale Tut.by. — Mnie adkazali, što ŭziać na siabie takuju adkaznaść jany nie mohuć, i adpravili ŭ rajvykankam. Ja patelefanavaŭ u adździeł ideałohii. Tam taksama nie viedali, jak zrabić. Skazali, z takim nie sutykalisia, i paraili źviarnucca da namieśnika staršyni rajvykankama. Jon adkazaŭ: u situacyi treba razabracca.
Ahułam pieramovy doŭžylisia paŭtara tydnia.
Rolik rajvykankamu, kaža chłopiec, spadabaŭsia. Adnak uładam nie spadabałasia słova «afihieć», i Viktaru daviałosia jaho redahavać.
