Tusk zaklikaŭ lidaraŭ ES rychtavacca da horšaha scenaru pa Brexit
Paśla taho jak pieramovy Łondana i Brusela nakont pytańnia vychadu Brytanii ź ES znoŭ zajšli ŭ tupik, Donald Tusk zaklikaŭ lidaraŭ Jeŭrasajuza rychtavacca da horšaha — da Brexit biez dasiahnieńnia papiaredniaha pahadnieńnia.
Staršynia Jeŭrapiejskaj rady Donald Tusk u svaim zvarocie da lidaraŭ ES zaklikaŭ ich być hatovymi da vychadu Vialikabrytanii z sajuza biez dasiahnieńnia ŭhody z Bruselem, piša Reuters. Razam z tym jon padkreśliŭ, što hety fakt nie pavinien pryvieści da spynieńnia dyjałohu z Łondanam.
Kiraŭnik Jeŭrarady pryznaŭ, što scenar vychadu Vialikabrytanii ź ES biez pahadnieńnia da ciapierašniaha momantu «bolš imavierny, čym kali-niebudź». Tym nie mienš jon zaklikaje lidaraŭ Jeŭrasajuza prykłaści ŭsie namahańni da taho, kab paźbiehčy takoha vyniku.
«Toj fakt, što my rychtujemsia da scenaru biez damovy, ni pry jakich abstavinach nie pavinien advodzić nas ad taho, kab my prykładali ŭsie namahańni ŭ dasiahnieńni zhody… Nie budziem zdavacca», — napisaŭ Tusk.
14 kastryčnika krynicy Politico paviedamili, što napiaredadni samitu ES bakam pieramovaŭ ab Brexit udałosia dasiahnuć papiaredniaj damovy. Adnačasova brytanski departamient pa vychadzie ź Jeŭrasajuza zrabiŭ zajavu ab niezapłanavanaj pajezdcy pa Brexit ministra Daminika Raaba ŭ Brusel. Adnak paźniej, paśla praviadzieńnia pieramovaŭ u Bruseli, stała viadoma, što i hetaja sproba damovicca paciarpieła krach.
Paśla pieramovaŭ u Bruseli brytanskaje Ministerstva pa spravach Brexit vypuściła zajavu, u jakoj paviedamiła, što baki damahlisia prahresu «ŭ šerahu klučavych abłaściej na pieramovach». Adnak ab jakim-niebudź istotnym pośpiechu pa vynikach razmovy pradstaŭnikoŭ Łondana i Brusela ŭ Vialikabrytanii zamaŭčali.
Lidary ES na samicie ŭ Aŭstryi 20 vieraśnia adchilili płan Mej pa vychadu z sajuza. Joj paraili pajści na sastupki pa handli i mytnych pahadnieńniach na miažy Vialikabrytanii i Irłandyi. Tusk taksama zajaviŭ Mej, što ŭ isnujučaj formie jaje płan Brexit, što pahražaje adzinamu rynku, nie zmoža pracavać, niahledziačy na najaŭnyja pazityŭnyja elemienty.
