U Mieksicy mužčyna trymaje na terasie troch lvoŭ i admaŭlajecca addavać ich
Žychar Miechika admoviŭsia addać troch lvoŭ, jakija žyvuć u jaho doma na terasie, piša bbc.com.
Fiederalnyja inśpiektary pa abaronie navakolnaha asiarodździa kažuć, što siamju źviaroŭ nieabchodna pieravieźci ŭ inšaje miesca dla zabieśpiačeńnia adpaviednaha nahladu za imi.
Ryk lvoŭ vyklikaje niespakoj u žycharoŭ ščylna zabudavanaj miascovaści ŭ stalicy Mieksiki.
Pa dadzienych miascovych ŚMI, susiedzi skardzilisia na lvoŭ u sacyjalnych sietkach.
Amar Radryhies kaža, što jon trymaje lvoŭ, bo choča, kab jaho ŭnuki mieli mahčymaść ubačyć redki bieły vid, paviedamlaje vydańnie El Universal.
«Ja viedaju, što heta, mahčyma, i nie najlepšyja ŭmovy, - skazaŭ spadar Radryhies ahienctvu AFP. — Najlepšyja ŭmovy, kab trymać lva, byli b u afrykanskaj savanie, dzie jon moža svabodna biehać, ale vy ž razumiejecie …»
Jon kaža, što trymaŭ lvoŭ na praciahu 20 hadoŭ, i maje adpaviednyja dakumienty ad fiederalnaha ahienctva abarony navakolnaha asiarodździa Profepa.
Adnak, ułady zajaŭlajuć, što spadar Radryhies nie pradastaviŭ adpaviednych dakumientaŭ, a ŭmovy žyćcia svojskich lvoŭ nie źjaŭlajucca zdavalniajučymi.
Radryhiesu zahadali dazvolić inśpiektaram naviedać jaho dom u rajonie Kałonija Asturyjas ŭ piatnicu abo spravu pieradaduć hienieralnamu prakuroru. Jaho taksama paprasili pakazać dakumienty ab pachodžańni lvoŭ.
Niespakoj vyras paśla taho, jak svojski leŭ napaŭ na mužčynu ŭ horadzie Sjudad-Chuares na poŭnačy krainy. Sajt navin Milenio paviedamlaje, što jaho ŭłaśnik pryjechaŭ dadomu pjany i kryčaŭ na drapiežnika.
Ilvica ŭ adkaz pakusała jaho. Ukusy byli hłybinioj da 10 sm.
