Siońnia i zaŭtra mahčymyja zboi ŭ pracy internetu. Ci budzie dostup da sajtaŭ?
Shutterstock.com
11 kastryčnika projdzie pieršaje ŭ historyi abnaŭleńnie naład abarony suśvietnaj sistemy damiennych imionaŭ. Karystalniki mohuć sutyknucca sa źnižeńniem chutkaści pracy Sietki, a dla niekatorych častka sajtaŭ, mahčyma, stanie niedastupnaja.
DNS — kampjutarnaja raźmierkavanaja sistema dla atrymańnia infarmacyi ab damienach. Mienavita jana dazvalaje ŭvieści ŭ radok braŭzera tekstavy URL-adras sajta (naprykład, NN.by) i złučycca ź nieabchodnym IP-adrasam.
«Pratakoły DNS, jak i mnohija inšyja technałohii, raspracoŭvalisia šmat hadoŭ tamu bieź mierkavańniaŭ ab biaśpiecy. Tamu niekatory čas tamu byŭ stvorany pratakoł DNSSEC. Heta tak zvanaje pašyreńnie sistemy biaśpieki damiennych imionaŭ, jakoje dazvalaje zabiaśpiečyć cełasnaść DNS dadzienych, — raspaviadała Alaksandra Kulikova, kiraŭnik ICANN pa pracy z krainami Uschodniaj Jeŭropy i Siaredniaj Azii.
Hetaja sistema pa sutnaści źjaŭlajecca kryptahrafičnym padpisańniem dadzienych karaniovaj zony. Jana stvarałasia bolš za dziesiać hadoŭ tamu. Toje, pra što my havorym siońnia, —abnaŭleńnie kluča dla padpisańnia klučoŭ (Key Signing Key). Heta, pa vialikim rachunku, źmiena hałoŭnaha kluča, jaki dazvalaje zabiaśpiečyć łancužok davieru, jaki paćviardžaje praŭdzivaść źviestak pry dazvole damiennych imionaŭ. Heta adbyvajecca nie tamu, što sistema niejkim čynam była skampramietavanaja, a prosta tamu što tak łahična i pravilna rabić».
U mianie złamajecca internet?
Abnaŭleńnie pačniecca siońnia 11 kastryčnika ŭ 19.00 pa minskim časie.
ICANN zahadzia papiaredžvała pra mahčymyja pieraboi ŭ pracy suśvietnaha internetu paśla hetaha momantu.
Pavodle acenak arhanizacyi, bolš za 99% karystalnikaŭ nie zaŭvažać abnaŭleńnia. Adnak niekatoryja mohuć sutyknucca ź ciažkaściami ŭ nastupnyja dvoje sutak.
«Tearetyčna niepadrychtavanaść sistem da źmieny kluča moža abiarnucca tym, što vy, zachacieŭšy zajści na resurs, prosta nie zmožacie adkryć staronku — budzie vydavacca pamyłka, — tłumačyła Alaksandra Kulikova. - Čamu? Mahčyma, vaš internet-pravajdar, apieratar sietki nie naładziŭ validacyju novaha kluča, kab sistema pryznavała jaho jak davierany kluč. Dla hetaha my kantaktujem z pradstaŭnikami techničnaj supolnaści. Pa-pieršaje, možna ŭručnuju ŭziać novy kluč i vykarystoŭvać jaho dla pieranaładki sistemy. Pa-druhoje, mnohija pravajdary vykarystoŭvajuć prahramnaje zabieśpiačeńnie, jakoje ŭžo maje mahčymaść aŭtamatyčna abnaŭlać kluč».
Jak zrazumieć, što prablema zakranuła mienavita vas?
«Kali ŭ kanfihuracyi jakara davieru rezołviera nie paznačany novy KSK, to na praciahu 48 hadzin paśla zaviaršeńnia abnaŭleńnia kluča karystalniki pačnuć atrymlivać paviedamleńni ab niemahčymaści dazvolić imia (zvyčajna ŭ formie pamyłak typu «server failure» ci SERVFAIL)», — havorycca ŭ paviedamleńni ICANN.
«Ja dumaju, što ŭ kančatkovym vyniku karystalniki nie pavinny paciarpieć, — ličyć Alaksandra Kulikova. — My robim usio dla apaviaščeńnia. Tak ci inakš, kali ŭ niejkaha asobna ŭziataha karystalnika uźnikajuć pytańni abo sumnieńni z nahody taho, ci nastrojeny jaho damašnija abo karparatyŭnyja internet-resursy dla taho, kab źmiena kluča prajšła biez pamyłak, možna prosta źviarnucca da svajho internet-pravajdara i zadać pytańnie».
