ŚMI: Piatroŭ i Bašyraŭ sačyli za Skrypalom u Čechii ŭ 2014 hodzie
Rasijanie Alaksandr Piatroŭ i Rusłan Bašyraŭ, jakich abvinavačvajuć u atručvańni eks-pałkoŭnika HRU Siarhieja Skrypala i jaho dački Julii, sačyli za byłym aficeram u Čechii. Pra heta paviedamlaje «Češskaje radyjo» sa spasyłkaj na krynicu ŭ raźviedsłužbach.
Pa dadzienych radyjostancyi, jany pabyvali ŭ Čechii ŭ kastryčniku 2014 hoda. U pryvatnaści, Piatroŭ spyniaŭsia ŭ adnym z hatelaŭ horada Ostrava z 13 pa 16 kastryčnika 2014 hoda, paśla čaho adpraviŭsia ŭ Prahu. Pa dadzienych krynicy, Bašyraŭ pabyvaŭ u češskaj stalicy 11 kastryčnika.
Skrypal prybyŭ u Čechiju ŭ druhoj pałovie kastryčnika taho hoda, kab sustrecca z češskaj raźviedkaj, paviedamlaje radyjostancyja. Śćviardžajecca, što mienavita aficery češskaj raźviedki dapamahli eks-pałkoŭniku HRU raskryć sačeńnie.
Akramia taho, «Češskaje radyjo» dapuskaje, što Piatroŭ i Bašyraŭ mahli być vysłany z krainy. Dakładnaj infarmacyi na hety kont niama, ale ŭ 2014 hodzie ŭłady Čechii vypravadzili z krainy z «mierkavańniaŭ biaśpieki» traich rasiejcaŭ.
