Kožny piaty ekśpiert u fiederalnaj słužbie, jakaja zajmajecca akredytacyjaj VNU ŭ Rasii, akazaŭsia płahijataram
Pałova pravieranych «Dysiernetam» ekśpiertaŭ Fiederalnaj słužby pa nahladzie ŭ śfiery adukacyi, jakaja zajmajecca akredytacyjaj VNU ŭ Rasii, akazalisia datyčnyja da abarony dysiertacyj z płahijatam; u piataj častki pravieranych sietkavaj supolnaściu ekśpiertaŭ płahijat znojdzieny ŭ ich ułasnych pracach. Hetaja vysnova ŭtrymlivajecca ŭ dakładzie «Dysierneta» «Ekśpierty Rosobrnadzora (2015—2018)», ź jakim aznajomiŭsia RBK.
Meta dakładu «Dysierneta» — acanić jakaść adboru ekśpiertaŭ Rosobrnadzora, jakija praviarajuć rasijskija VNU. Kryter acenki — kolkaść ekśpiertaŭ, jakija «sistematyčna ŭdzielničajuć u parušeńni normaŭ navukovaj etyki, sieryjnaj vytvorčaści falšyvych dysiertacyj, płahijacie va ŭłasnych dysiertacyjach i navukovych artykułach».
Aŭtary dakładu padkreślivajuć, što praviarali tych ekśpiertaŭ, u jakich dysiertacyi abaronienyja ŭ VNU i dysiertacyjnych savietach, pierš zaŭvažanych u šmatlikich parušeńniach. Z 224 čałaviek u 48 byli vyjaŭlenyja, jak śćviardžajuć u «Dysiernecie», niekarektnyja zapazyčańni va ŭłasnych pracach, u 23 była znojdziena padrobka ŭ dysiertacyjach, 116 ź ich byli zamiašanyja ŭ abaronie dysiertacyj z płahijatam i inšych parušeńniach.
«Atrymanyja vyniki dazvalajuć rabić vysnovy, što korpus ekśpiertaŭ Rosobrnadzora nie vałodaje ni dastatkovym prafiesijanalizmam, ni nieabchodnymi etyčnymi jakaściami dla vykanańnia ekśpiertnaj funkcyi. Rosobrnadzora nie pravodzić naležny adbor śpiecyjalistaŭ dla praviadzieńnia pravierak i tym samym całkam dyskredytuje siabie jak ekśpiertnuju arhanizacyju.
