Što my słuchali ŭ vieraśni: samyja značnyja muzyčnyja albomy miesiaca
Takoje adčuvańnie, što ŭ muzyčnaj industryi ŭ vieraśni adbyłosia niešta kštałtu «Dažynak»: takoj kolkaści muzyčnych navinak nie było za ŭvieś čas našych nazirańniaŭ.
Abrać šort-list dla tradycyjnaj padborki było niejmavierna składana, tamu my dla vas padrychtavali atrakcyjon muzyčnaj ščodraści: cełych 11 muzyčnych navinak — ad nastalhii pa lecie da dumak pra biessensoŭnaści budučyni. Taki voś vieraśniovy čart. A što vy chacieli ad vosieni?
Paul McCartney — Egypt Station
Egypt Station — heta fantastyčnaje miesca, ź jakoha adpraŭlajecca ŭ svoj šlach pa śviecie muzyka. Takaja fiłasofija pieršaha za 5 hadoŭ solnika lehiendarnaha sera.
Šlach u Egypt Station užo bolš paśpiachovy za papiarednija płytki Makartni — upieršyniu za 17 hadoŭ jaho albom uznačaliŭ amierykanskija čarty.
Jungle — For Ever
Druhi albom brytanskaha hurta, jaki vielmi talenavita źmiešvaje fank z soŭłam i sučasnymi techna-elektronnymi matyvami. Heta pieśni, pad jakija vielmi lohka sumujecca pa lecie, pad jakija dobra płanavać padarožžy ŭ ciopłyja krainy ci ŭzhadvać byłyja pryhody.
«Hriaź» — «Sunduk miertvieca»
Debiutny albom «Hriazi» — heta častkova aŭtabijahrafičnaja historyja žyćcia i śmierci liryčnaha hieroja. Adzin z rep-partałaŭ vielmi trapna apisaŭ albom šekśpiraŭskaj frazaj «Piekła pustoje, usie biesy tut».
Hurt byŭ zasnavany dvuma mahiloŭcami: Dzianisam Astapavym i Romaj Anhličaninam, jaki pamior u minułym hodzie i byŭ viadomy pa prajekcie ŁSP.
Alina Orlova — Daybreak
Litoŭskaja śpiavačka piatym albomam zaviaršaje svoj dziesiacihadovy «junacki cykł». Dalej čakajucca ekśpierymienty. Mahčyma, u budučym — navat instrumientalny albom ad Arłovaj.
BROCKHAMPTON — iridescence
Adzin z samych čakanych chip-chop albomaŭ hoda, jaki adrazu ŭznačaliŭ čart «Billboard 200». Nievierahodny pośpiech amierykanskaj hrupoŭki zamacavaŭsia prodažam bolš za 100 tysiač kopij płytki.
Suede — The Blue Hour
Vośmy studyjnik vieteranaŭ bryt-popu. Albom atrymaŭsia akademična zmročnym i vielmi vosieńskim. Chočacie pasumavać, pakul nie ŭklučyli aciapleńnie? Ciśnicie na play.
Motorama — Many Nights
U muzyčnym płanie Rastoŭ-na-Donie — heta, u pieršuju čarhu, ruski rep z Bastaj va ŭsich uvasableńniach i hurtom Kasta. I tolki potym Motorama, jakija ličacca adnym z najlepšych post-pank kalektyvaŭ sučasnaści i majuć šmat prychilnikaŭ u Jeŭropie.
Hurt natchniaŭsia paezijaj Arciura Rembo i Alaksandra Błoka i zaprašaje vas u padarožža pa siurrealistyčnych suśvietach.
The Crystal Method — The Trip Home
Skot Kirkłend zastaŭsia adzin i sprabuje pranieści ŭnikalny saŭnd The Crystal Method praź lichamanku sučasnaj elektronnaj muzyki.
Biez chimičnych reakcyj nie abyšłosia, ale prychilniki musiać zastacca zadavolenymi.
Cypress Hill — Elephants On Acid
Kambek ołdskulnaha chip-chopu. Viarnuŭsia Eminiem, viartajecca i «Sajpres Chił»!
Lehiendy amierykanskaj sceny vosiem hadoŭ maŭčali i vydali maksimalna psichadelična-ekśpierymientalny albom.
IC3PEAK — «Skazka»
Maskoŭski duet pačynaŭ z anhłamoŭnaj elektroniki, ale z časam transfarmavaŭ tvorčaść u kazku pra čornuju rasijskuju rečaisnaść: mitynhi, palicyju i śviet paśla taho, jak ciabie nie stanie.
Siarhiej Babkin — «Muzaśfiera»
Pieršy ŭkrainaamoŭny albom Siarhieja Babkina, pra jaki aŭtar zaŭsiody maryŭ.
Muzaśfiera — heta abałonka, u jakoj znachodzicca muzyka. Heta Sonca, śfiera, dziakujučy jakoj źjaviłasia ŭsio žyvoje na Ziamli.
A što vy słuchali ŭ vieraśni? Pišycie ŭ kamientarach!