Kurejčyk pra «Makajonka, 9»: Paśpiachovaje šou budzie tady, kali pieršy jaho žart budzie pra Łukašenku
Pahladzieŭ «Makajonka, 9», u narodzie viadomaje jak «Viačerni Pierlin». Nie toje kab voś źbiraŭsia i chacieŭ, ale prosta lublu hety farmat. Heta dobry farmat, prydumany i raspracavany amierykancami, jaki paśpiachova idzie na ekranach televizaraŭ usiaho śvietu ŭžo paŭstahodździa faktyčna štodnia (u tym liku i ŭ takich antyamierykanskich krainach, jak Rasieja ci Vieniesueła).
Kłasikaj farmatu była trojca vialikich amierykanskich komikaŭ —Karsan, Leterman, Lena. Usio ŭžo na piensii. Nastupnaja chvala: Kimel, Konan Obrajn, Krejh Fierhiusan, Džon Ściuart, Bił Majer. I novaje pakaleńnie, jakoje na hałoŭnych ekranach zaraz: Styvien Kołbier (samy talenavity), Set Majers, Trevar Noj, Džejms Korden i hałoŭnaje, i ja b skazaŭ madelnaje, viačerniaje šou kanała NBC «Tonight Show» Džymi Fełana (ź jaho całkam «śpisany» «Viačerni Urhant). Ja bačyŭ ich usio, mnostva epizodaŭ kožnaha ź ich. Mahu skazać, što ŭ Biełarusi naŭrad ci jość čałaviek, jaki bačyŭ ich bolš i raźbirajecca ŭ viačernich šou lepš.
Bolšaść u nas nie hladzić dobraje telebačańnie i nie viedaje, jak jano ŭvohule vyhladaje. I treba addać naležnaje, «Biełteleradyjokampanija» nikoli nie davała takich šancaŭ. Ale prafiesijanały ŭsio heta viedajuć.
Tym bolš niezrazumieła, čamu była vypuščana takaja łaža. Bo ŭsio ŭžo projdziena da nas i ŭ Amierycy, i ŭ Rasii, treba prosta zrabić taksama. Nie zrabili.
Takim čynam, čamu ŭ «Makajonka, 9» nie atrymałasia. Dazvolu sabie nahadać «BT» prostyja vidavočnyja praviły farmatu takich prahram (maju prava na mientarski ton choć by tamu, što ŭžo 7 hadoŭ znachodžusia na ich «volnym, hy-hy-hy, tb» u «čornym śpisie», i nikoli tam nie byvaju, i my isnujem absalutna paralelna i ničoha adzin adnamu nie vinny).
1. Nazva. Viečarovaje šou zaŭsiody asacyjujecca z «chostam» — čałaviekam, jaki prymaje šou. Jaho imia — zaŭsiody asnoŭny brend. Druhaja častka nazvy — zaŭsiody časavy słot: viečar, dzień, noč. Zaŭsiody. Heta pryvučaje hledača kožny dzień ŭklučać televizar u adzin i toj ža čas, kab pahladzieć na kankretnaha «chosta» (navat piakielny prapahandyst Uładzimir Sałaŭjoŭ heta zrazumieŭ). «Makajonka, 9» — heta ni pra što.
2. Rezanior. Va ŭsich viadučych viačernich šou zaŭsiody jość rezanior — čałaviek, jaki adyhryvaje žarty viadučaha. Bieź jaho pałova žartaŭ nie pracuje.
3. Publika. Asnoŭnaja zadača publiki na viačernich šou — stvarać žyvy śmiech. Jon i jość reakcyja. Žyvy śmiech studyi. Pieradpiensijnaha vieku ludzi ź vinavataj uśmieškaj — heta śmierć reakcyi.
4. Muzyka. U takich šou muzyki albo fryki, albo stylahi, ale abaviazkova sa svajoj žyvoj reakcyjaj. Heta zaŭsiody rezanior-2.
5. Palityka. Va ŭsich viačernich šou abaviazkovyja palityčnyja žarty. Pieršy stend-ap — heta zaŭsiody navinny błok. I jak na CNN, tak i na ATN jon zaŭsiody pačynajecca ź pieršaj asoby. Usie viačernija šou zaŭsiody pačynajuć stend-apam z Trampa. Dyk voś pieršaje paśpiachovaje viačerniaje šou ŭ nas budzie tady, kali pieršy jaho žart budzie pra Łukašenku.
6. Nu i hałoŭnaje — viadučy. Pryroda viadučaha viačernich šou zaŭsiody adna — ironija, jakaja miažuje z sarkazmam (abo sarkazm, jaki miažuje ź ironijaj). Plus impravizacyja. Pierlin, moža być, dobry chłopiec, ale pa vobrazie vidavočny bajaźliviec i prystasavaniec (heta bačna navat pa maniery brać intervju). Navat vostryja (pa našych mierkach) žarty hučać zładziejavata. Impravizacyi — nul. Nu a ŭ tym, kab paściabacca abo padjałdyknuć, heta prosta za hrańniu mahčymaściaŭ. Karaciej, kalehi, vučycca treba. A nie tupić!
