Bolš za pałovu biełarusaŭ nie čytajuć knih
Mienš za pałovu biełarusaŭ z roznaj pieryjadyčnaściu čytajuć mastackuju litaraturu, astatnija zusim nie dakranajucca da knih. Ź biełaruskich aŭtaraŭ čaściej nazyvajuć Karatkieviča i Aleksijevič. Takija vyniki daśledavańnia, praviedzienaha Instytutam sacyjałohii NAN Biełarusi.
Fota: olg-karlsruhe.de.
Padčas manitorynhu apytali 3,8 tysiačy čałaviek u 2016 hodzie, raspavioŭ navukovy supracoŭnik Instytuta sacyjałohii Kirył Stasielka.
Akazałasia, što tolki 49% čytajuć mastackuju litaraturu, a jašče amal stolki ž nie čytajuć zusim. Pry hetym štodnia adkryvajuć knihu kala 7% respandentaŭ, jašče 16% čytajuć adzin abo niekalki razoŭ na tydzień. Niekalki razoŭ na miesiac — 10%, a radziej za adzin raz jašče 15%.
Kali ž kazać pra sučasnuju biełaruskuju litaraturu, to da jaje zvaročvajucca 12% hramadzian. Jašče 57% pryznalisia, što nie čytajuć, a tracina nie zmahła adkazać na pytańnie.
Ludziej taksama paprasili nazvać tvory sučasnych biełaruskich aŭtaraŭ, jakija jany čytali za apošnija try hady. Bolš za 2% apytanych nie zhadali ni adnaho aŭtara.
Tym nie mienš atrymaŭsia nastupny top-5 piśmieńnikaŭ, čyje tvory nazyvali najčaściej (i, darečy, nie ŭsie ź ich — sučaśniki):
— Uładzimir Karatkievič (zhadali 1,3% ad usich apytanych)
— Śviatłana Aleksijevič (1,2%)
— Vasil Bykaŭ (0,7%)
— Ivan Mielež (0,4%)
— Natalla Batrakova (0,4%).
Kali ž kazać pra pieryjadyčnaść, to štodnia čytajuć biełaruskich aŭtaraŭ 0,5% z usich respandentaŭ. Jašče dva pracenty čytajuć adzin abo niekalki razoŭ na tydzień. 2,7% zvaročvajucca da knihi paru razoŭ na miesiac, a jašče bolš za 7% — navat nie kožny miesiac.