MAZ pačnie źbirać mikraaŭtobusy i furhony
Fota pres-słužby MAZa
Minski aŭtamabilny zavod u listapadzie zapuścić u Breście pieršuju sieryjnuju vytvorčaść mikraaŭtobusaŭ i furhonaŭ. Mašyny buduć aryjentavanyja na ŭnutrany rynak, raspaviali pres-słužbie zavoda
Zboračnaja vytvorčaść razhorniecca na svabodnych płoščach AAT «Brestmaš». Dla hetaha ŭžo vydzieleny i padrychtavany nieabchodny ŭčastak.
Minski aŭtazavod realizuje prajekt za košt ułasnych inviestycyj. «Razhladalisia roznyja varyjanty finansavańnia, u tym liku pryciahnieńnie pazykovych srodkaŭ. Ale było vyrašana rabić usio svaimi siłami i resursami, što pavinna stanoŭča adbicca na inviestycyjnaj pryvabnaści prajekta», — adznačyli ŭ AAT «MAZ».
Pieršym pojdzie ŭ sieryjnuju vytvorčaść pasažyrski mikraaŭtobus MAZ 281, pratatyp jakoha ŭžo prajšoŭ usie nieabchodnyja vyprabavańni. Daŭžynia navinki składaje 6 m, šyrynia — 2,1 m, vyšynia — 2,8 m, a kołavaja baza - 3,57 m. Na zavodzie praduhledzieli niekalki varyjantaŭ sałona - ad hruzavoha da śpiecyjalnaha pasažyrskaha, u jakim 16 siadzieńniaŭ biez uliku miesca kiroŭcy.
Fota pres-słužby MAZa
Akramia taho, raspracavany hruzavy furhon MAZ-365022 z sucelnamietaličnym kuzavam i intehravanaj u jaho ramaj. Pamiery mašyny takija ž, jak i ŭ mikraaŭtobusa. Maksimalnaja masa dasiahaje 4050 kh.
