Internet krytyčna pryniaŭ humarystyčnaje šou BT
Pry kancy vieraśnia ŭ efiry «Biełaruś 1» vyjšła pieršaja prahrama ŭ žanry late night show — heta takaja zachodniaja zabaŭlalnaja madel pieradač, pa jakoj, naprykład, pracuje «Viečarovy Urhant».
Biezumoŭna, ajčynnaj teleprastory daŭno brakuje ŭłasnaha humarystyčnaha šou. Na Biełteleradyjokampanii pryjšli da ŭśviedamleńnia hetaj chiby i pasprabavali jaje vypravić.
Nazvali novuju pieradaču «Makajonka, 9».
Jak ža prajšoŭ pieršy vypusk? Ci atrymałasia ŭ BT stvaryć taki ruskamoŭny kantent, jaki byŭ by cikaviejšy za ruskamoŭny kantent z Maskvy i Pieciarburha?
Prahramu viadzie Jaŭhien Pierlin, viadomy pa «Dobraj ranicy, Biełaruś», navinach, prahramach pra Mytny sajuz, Jeŭrabačańni…
Prykra, ale najbujniejšaja telekampanija krainy nie zdoleła vyhadavać ci rekrutavać talenavitaha i charyzmatyčnaha komika, tamu zakryła dzirku viadučym šyrokaha profila.
Čym ža jany sabralisia nas viesialić?
Pakul vyhladaje, što aniekdotami časoŭ Chałodnaj vajny i baradatymi videa.
Ci mahčyma ŭ 2018-m prabić na ŭśmiešku čałavieka, pakazaŭšy jamu videa dziesiacihadovaj daŭniny? Raskazaŭšy aniekdot pra Rejhana?
A momanty kštałtu apantanaha raspoviedu žurnalistki pra toje, jak joj dazvolili pazdymać kavuny u rezidencyi Rachmona («…ich možna na miescy parezać nažom!»), navodziać na pytańnie: a heta dakładna satyryčnaje šou?
Hory kavunoŭ ciahnuć prynamsi na žart pra toje, što choć niedzie na terytoryi eks-SSSR asobna ŭziataja hrupa ludziej pabudavała dla siabie kamunizm. Ale ž tak žartavać u efiry BT nielha.
Daliboh, infarmacyjnaje absłuhoŭvańnie vyšejšaj ułady navat u humarystyčnaj prahramie škodzić joj, vyhladaje naciahnuta i zabivaje sutnaść — atrymlivajecca nie zajaŭlenaje late night show, a «Panarama», raźviedzienaja sałodkaj vadoj i Jarmolenkam.
U internecie pieršy vypusk «Makajonka, 9» raźnieśli ŭščent — premjera nabrała kala 13 tysiač prahladaŭ na Youtube, ale ŭžo prynamsi dźvie tysiačy čałaviek pastavili videa admoŭnuju acenku.
Absalutnaja bolšaść kamientaroŭ vytrymanaja ŭ duchu nižejšaha skrynšota.
Varta adznačyć, što bolš udumlivaja publika nazyvaje «Makajonka, 9» u lubym razie krokam napierad.
U pryvatnaści, kiraŭnik «Kinakonha» Andrej Kim adznačaje, što farmat viečarovaha zabaŭlalnaha šou vielmi ciažki ŭ realizacyi i pakul što rana kazać, jak prahrama pojdzie dalej.
Młosnyja tvary masoŭki, za jakija mocna krytykujuć prahramu
«Pieršyja vypuski taho ž «Urhanta» byli biaskonca druhasnyja i panyłyja. Zaraz palepš (chacia ŭsio roŭna druhasna), ale prajšło 6 hod! Tamu davajcie pahladzim na našaje šoŭ prynamsi praz hod», — napisaŭ Kim.
Taksama cikava, što adzin z aŭtaraŭ prahramy — heta Andrej Makajonak, zaŭvažny biełaruski stendapier i komik, jaki paśpieŭ vystupić na mnohich zamiežnych placoŭkach.
