Kiraŭnik Biełkaapsajuza: U nas 2000 stratnych kramaŭ. Ale kali ich zakryć, što budzie z rabotnikami?
Valeryj Ivanoŭ — kolišni staršynia Škłoŭskaha rajvykankama, vice-premjer, hienieralny dyrektar Biełaruskaj kalijnaj kampanii. A jašče žychar Drazdoŭ.
Ciapier jon staršynia praŭleńnia Biełkaapsajuza. Paśla sustrečy z Alaksandram Łukašenkam jon raskazaŭ u efiry «Biełaruś 1» pra stan spraŭ u arhanizacyi.
Pra kankurencyju z pryvatnymi sietkami
«U Biełarusi 25.000 nasielenych punktaŭ. 100 punktaŭ adkryła pryvatnaja sietka (havorka viadziecca pra kramy Jeŭraopta ŭ vioskach — «NN»). A 24.900 kali adčynić? Chaj adkryvaje, raźvivajecca. Nas heta zusim nie chvaluje, a tolki padhaniaje da lepšaj pracy. Ujaŭlajecie, što takoje 25.000 i 100? Jość sietka z 34 handlovymi punktami i nie ŭ samych składanych rajonach. I to jany majuć ciažkaści. Dyk heta leta, a pryjdzie zima, viasna, pryjdzie raźliŭ, kali ŭ hetym hodzie absłuhoŭvali dva miesiacy na łodkach. Jaki pryvatnik na łodcy paviazie chleb kudy-niebudź? Nichto. Heta ŭsio nahniatańnie abstanoŭki, nieviadoma dla čaho. Dzie choć adzin punkt hramadskaha charčavańnia ŭ vioscy? Dzie na siale adkryłasia dobraja pryvatnaja stałovaja? Niama takoha. A ŭ nas amal 1.000 takich stałovych ŭ vioscy».
Pra stratnyja kramy
«Nasieleny punkt u Žytkavickim rajonie. Tam nievialikaja kolkaść žycharoŭ. Mahazin začyniać treba, pa vialikim rachunku. Ale nasielnictva prosta prosić nie začyniać, pakolki heta adzinaje miesca, dzie možna było sabracca ŭ hetaj viosačcy. My vyrašyli, što za košt niejkich inšych pytańniaŭ, prybytkovych, budziem utrymlivać takija handlovyja punkty. Ich 2.000. Adnačasova zakryć — heta budzie niapravilna. U hetym zaklučajecca adna z sacyjalnych funkcyj spažyŭkaapieracyi. Pa ŭmovach biznesu, viadoma, treba začyniać: albo arhanizuj stanoŭčuju pracu punkta, albo prymaj niejkaje niepapularnaje rašeńnie. My prymajem takija rašeńni pa ŭzhadnieńni ź miascovymi ŭładami. Ale kab pavalna začyniać 2.000 mahazinaŭ… Pa-pieršaje, tam 2 tysiačy čałaviek pracujuć. Što ź imi rabić? Pa-druhoje, nasielnictva nam nie vykaža słovy padziaki. Zakryć — samaje prostaje rašeńnie. Prybiaruć kramu — i vioski nie stanie».
Pra rebrendynh
«Źmiakčyć adroźnieńnie pamiž horadam i vioskaj u sielskim handli — adzinaje, navošta heta robicca. Možna prajechać pa našych kramach — hetaj roźnicy ŭžo praktyčna niama. Asartymient toj ža, absłuhoŭvańnie, vykładka tavaraŭ i mahčymaść u čałavieka zrabić vybar. My naohuł prybrali pryłavak. I luby, chto zachodzić, adrazu dzivicca: moža, my ŭ «Jeŭraopt» trapili? Rekłamuju zaraz našaha kankurenta».
Fota polese.by
