Navukoŭcy rašyli dźvie staražytnyja matematyčnyja zadačy
Brytanski matematyk Majkł Acja dakazaŭ hipotezu Rymana — adnu z «zadač tysiačahodździa», za rašeńnie jakoj dajuć 1 miljon dalaraŭ. Jon atrymaje hrošy, kali dokaz budzie paćvierdžany navukovaj supolnaściu.
Dokaz zajmaje ŭsiaho 15 radkoŭ, a razam z ustupam i śpisam litaratury — piać staronak. Tekst Acja vykłaŭ na servisie Google Drive.
Hipoteza ab raźmierkavańni nuloŭ dzeta-funkcyi Rymana była sfarmulavanaja matematykam Biernchardam Rymanam u 1859 hodzie. Jana apisvaje, jak raźmieščany na likavaj pramoj prostyja liki.
U toj čas jak nie znojdziena jakoj-niebudź zakanamiernaści, jakaja apisvaje raźmierkavańnie prostych likaŭ siarod naturalnych, Ryman vyjaviŭ, što kolkaść prostych likaŭ, jakija nie pieravyšajuć x, — funkcyja raźmierkavańnia prostych likaŭ, jakaja paznačajecca π(x) — vyražajecca praz raźmierkavańnie tak zvanych «nietryvijalnych nuloŭ» dzeta-funkcyi.
Hipoteza Rymana śćviardžaje, što ŭsie nietryvijalnyja nuli dzeta-funkcyi lažać na viertykalnaj linii Re=0,5 kompleksnaj płoskaści. Hipoteza Rymana važnaja nie tolki dla čystaj matematyki — dzeta-funkcyja pastajanna vypłyvaje ŭ praktyčnych zadačach, naprykład, u kryptahrafii.
Hipoteza Rymana ŭvachodzić u śpis siami «zadač tysiačahodździa», za rašeńnie kožnaj ź jakich Matematyčny instytut Kłeja ŭ ZŠA płacić 1 miljon dalaraŭ.
U svaju čarhu daśledčyki Univiersiteta Kejo (Japonija) rašyli staražytnuju matematyčnuju zadaču ab isnavańni pramavuholnaha i roŭnabakovaha trochvuholnikaŭ z adnolkavaj płoščaj i pierymietram.
Pavodle vysnoŭ Jošyjuki Chirakavy i Chideki Macumury, isnuje racyjanalny pramavuholny trochvuholnik z hipatenuzaj, roŭnaj 377 santymietram, i katetami, roŭnymi 352 i 135 santymietram adpaviedna, a taksama racyjanalny roŭnabakovy trochvuholnik z bakami, roŭnymi 366 santymietram, i 132- santymietrovaj asnovaj. Pierymietr i płošča hetych unikalnych hieamietryčnych fihur roŭnyja, a inšych padobnych par nie isnuje.
