U Koŭnie na nabaženstva Papy Franciška sabrałasia bolš za sto tysiač viernikaŭ
Bolš za 100 000 viernikaŭ ranicaj u niadzielu sabrałasia ŭ Kovienskim parku Santakas, kab uziać udzieł u nabaženstvie, jakoje praviadzie Papa Rymski Francišak.
Z samaj ranicy na płoščy demanstravalisia dakumientalnyja filmy, vierniki dzialilisia svaimi śviedčańniami. Dla aśviatleńnia mierapryjemstva pryjechali kala 200 zamiežnych žurnalistaŭ, noč u dvanaccaci škołach Koŭna praviali 1400 pilihrymaŭ z Ukrainy, Biełarusi, Polščy, Łatvii i Rasii.
82-hadovaja Ałdona Piačukajte, jakaja pryjechała z Raŭdandvarysa, skazała, što viera padtrymlivała jaje ŭ ssyłcy ŭ Sibiry, i ŭspomniła, što bačyła papu Jana Paŭła II u 1993 hodzie. «Vielmi chaču apošni raz ubačyć papu», — skazała žančyna.
Papa Francišak prylacieŭ u Litvu ŭ subotu. Jon sustreŭsia ŭ Vilni z kiraŭnikami dziaržavy, źviarnuŭsia da viernikaŭ z Vostraj Bramy i na Kafiedralnaj płoščy. Pa słovach arhanizataraŭ, vitać papu ŭ Vilni ŭ subotu sabrałasia 60 tysiač čałaviek. U Vilni papa zaklikaŭ litoŭcaŭ znachodzić siłu ŭ minułym naroda, ale być pry hetym pamiarkoŭnymi i nie paddavacca tym, chto zaachvočvaje razdroblenaść, karystajučysia pačućciom nieabaronienaści.
U druhoj pałovie dnia ŭ niadzielu papa Francišak viarnuŭsia ŭ litoŭskuju stalicu, dzie ŭšanavaŭ pamiać achviar savieckaha i nacysckaha režymaŭ.