Kiraŭnik najbujniejšaj pryvatnaj aptečnaj sietki vyjšaŭ na volu
Staršynia savieta dyrektaraŭ chołdynhu «Apteka hrup» Leanid Tomčyn na dniach vyjšaŭ na volu. Infarmacyju pra heta TUT.BY paćvierdzili dźvie krynicy, znajomyja ź biznesmienam. Raniej paviedamlałasia, što jaho zatrymali pa «spravie miedykaŭ».
Fota: mishpoha.org
21 vieraśnia Tomčyn daŭ intervju Office Life. Jon nastupnym čynam adkazaŭ na pytańnie ab paviedamleńniach pra svajo zatrymańnie ŭ siaredzinie žniŭnia: «Ciapier ja pierad vami. Dumaju, heta i jość adkaz na hetaje pytańnie».
Leanid Tomčyn, pavodle jaho słoŭ, maje namier praciahvać zajmacca dabračynnaściu, realizoŭvać kulturnyja prajekty ŭ novaj viciebskaj sinahozie, budaŭnictva jakoj fundavaŭ, i raźvivać biznes (sietki aptek «Dobryja leki» i ADEL).
— My płanujem praciahnuć sumiesny prajekt ź Jeŭrapiejskim bankam rekanstrukcyi i raźvićcia (JEBRR) pa miezaninnym kredytavańni i finansavańni našych aptek. U najbližejšy čas u nas budzie ščylny hrafik rabočych sustreč z pradstaŭnikami JEBRR i z radaj dyrektaraŭ chołdynhu. Nasyčany hrafik i mnostva płanaŭ — heta charakterna dla ŭsioj kamandy chołdynhu, u tym liku i dla mianie, — skazaŭ Tomčyn.
U studzieni 2018 hoda jaho kampanija pryciahnuła ŭ JEBRR 5 miljonaŭ jeŭra na raźvićcio roźničnaj sietki. «Hetaje pahadnieńnie dazvolić za 5 hadoŭ padvoić kolkaść aptek pad brendami ADEL i» Dobryja leki»», — kazaŭ jon na pres-kanfierencyi. Za hety čas ahulnaja kolkaść aptek płanavałasia davieści da 400 va ŭsich rehijonach krainy.
Surazmoŭcy TUT.BY skazali, što biznesoŭcu źmienienaja miera strymańnia (raniej jon znachodziŭsia pad vartaj, kab jon moh kiravać biznesam.
Atrymać kamientar u pres-słužbie KDB Biełarusi nie ŭdałosia. Mabilny telefon Leanida Tomčyna niedastupny.
U «Apteka Hrup» uvachodziać 6 roźničnych kampanij, dva miedcentry, IT-słužba i padraździaleńnie pa kantraktnaj vytvorčaści lekaŭ, a taksama aptovaja kampanija «VitFarmMarkiet». U chołdynhu pracujuć bolš za 1000 čałaviek.
