Dyrektarka «Teatralnaha kufra» Kaciaryna Saładucha pra tendencyi ŭ moładzievym teatry
U hety momant u Minsku prachodzić užo 15-ty pa liku mižnarodny fiestyval moładzievych i studenckich teatraŭ «Teatralny kufar, BDU». Mienavita tamu ŭ našu štotydniovuju rubryku «Piać rečaŭ» my vyrašyli zaprasić jaho dyrektarku Kaciarynu Saładuchu.
— Ja pryjšła ŭ kamandu «Kufra» ŭ samym pačatku historyi fiestyvalu. U 2004 hodzie tolki skončyła BDU, ale praciahvała być źviazanaj z kulturnym žyćciom univiersiteta: pracavała na 0,5 staŭki va ŭpraŭleńni pa spravach kultury. Na feście pačała ŭ jakaści vałanciorki, paśla stała kaardynatarkaj mižnarodnaj prahramy, a ŭ 2006-m — dyrektarkaj. «Kufar» daŭ mnie šmat novaha dośviedu, kantaktaŭ i cikavych prajektaŭ. I štohod hety bahaž tolki raście, što vielmi karysna dla mianie jak kulturnaj mieniedžarki.
Cikava, što apošnim časam na fiestyval amal nie prychodziać zajaŭki z kamiedyjami: na 100 takich moža być litaralna 1-2. Byŭ momant, kali my mieli ŭ prahramie šmat zabaŭlalnaha kantentu, kali moładź chacieła viesialicca na scenie. Ale apošnija niekalki hod jany šukajuć adkazy na pytańni času. Heta, na moj pohlad, dobra: moładzievyja i studenckija teatry zaŭsiody byli aktualnymi.
Kali ŭ hetym hodzie my adkryvali teatralnuju dekadu, to adrazu praviali kruhły stoł na temu moładzievych teatraŭ. Ź minułaha hoda naša prahrama składajecca napałovu z amatarskich, napałovu z prafiesijnych hrup.
I staŭ zaŭvažany niejki kryzis u asiarodździ biełaruskich studenckich teatraŭ. Byli svaje hrupy ŭ BDUIR, na FMA, ale jany, jak i inšyja, źnikli sa ścien univiersitetaŭ pa tych ci inšych pryčynach: nie znajšli padtrymki, zhubili intares, uźnikli ideałahičnyja pytańni…
Na žal, heta tak. U našych zamiežnych kaleh zusim inšaja situacyja: tam amal u kožnym univiersitecie jość svaja teatralnaja hrupa. I navat nie adna. Heta ličycca prestyžnym i dla samich maładzionaŭ, i dla administracyi.
U Biełarusi, Litvie, Estonii i Rasii, darečy, vielmi raspaŭsiudžanaja situacyja, kali vučacca na adnoj śpiecyjalnaści, paralelna hrajuć u studenckim teatry i paśla vyrašajuć pastupić na akcioraŭ, stanoviacca znakamitymi artystami. Tak, u minułym hodzie dźvie dziaŭčynki z teatra «Na bałkonie» BDU pastupili ŭ teatralnaje vučylišča imia Ščepkina ŭ Maskvie.
U 2015 hodzie «Kufar» amal byŭ na miažy spynieńnia isnavańnia, my navat źbirali hrošy na kraŭdfandynh-placoŭcy.
Lahčej nie stała, ale dziakuj partnioram, u tym liku zasnavalniku fiestyvalu BDU, jakija štohod usio ž nas padtrymlivajuć. Chaj nie ŭsie finansava, niechta — rečami i placoŭkami. Heta taksama važna. Kab u tym liku vyrašać prablemy z hrašyma, my zrabili płatny ŭvachod na fiestyval (10 hod zapar jon byŭ biaspłatnym). Paśla stali brać, kab kantralavać patok hledačoŭ, za prahlad śpiektaklaŭ simvaličny rubiel, siońnia uvachod kaštuje 5. Taksama niašmat, bo ŭsia naša asnoŭnaja aŭdytoryja — heta studenty.
U hetym hodzie ŭ nas źjaviŭsia asobny dzień, pryśviečany sučasnaj biełaruskaj pjesie, jaki my robim sumiesna z Centram biełaruskaj dramaturhii.
Štohod my starajemsia prasoŭvać biełaruskuju dramaturhiju ŭsimi mahčymymi sposabami, i hetyja prajekty dajuć svaje vyniki: cikaŭnaść da pjes biełaruskich aŭtaraŭ pavialičvajecca.
Akramia «Kufra», ja pracuju nad teatralnym prajektam «HomoCosmos», u miežach jakoha my stavim śpiektakli pra čałavieka, jaho cieła i ŭzajemasuviaź z rozumam, biez tabu. Rychtujem čarhovuju premjeru: materyjał budzie zamiežny, pakul nie skažu jaki. Ale pracavać nad im budzie znakamity režysior Vital Dudzin. Papiaredniaja data premjery — 3 śniežnia na placoŭcy RTBD.
Uvohule ž, my b chacieli vyraści ŭ teatralny centr, sa svaimi majstar-kłasami i treninhami.
Top-5 lubimych rečaŭ
Telefon
U fiestyvalnyja dni jon zaŭsiody ŭ rukach: za dzień mohuć rabicca i prymacca sotni zvankoŭ. Telefon — heta i hałasavy srodak kamunikacyi, i piśmovy.
Kampjutar
Praciahvajučy pracoŭnuju temu, nie mahła nie zhadać kampjutar. Jon amal zaŭsiody sa mnoj: kali nie pracuju, to i filmy hladžu na im, i knižki čytaju.
Samy moj hałoŭny dapamožnik u kampjutary — heta huhł-kalandar, jaki paralelna jość i ŭ telefonie. Apošnija tydni praca zaciahvajecca da 3-4-ch ranicy, tamu biez kalendara, jaki nie daje prapuścić niešta važnaje, nijak.
Knižka Virdžynii Vułf
Pa adukacyi ja fiłołah: zakančvała ramana-hiermanskuju fiłałohiju ŭ BDU. Majoj śpiecyjalizacyjaj była mienavita zamiežnaja litaratura, jakuju ja vielmi lublu. Ja skončyła aśpiranturu i nie kidaju nadziei (voś užo 10 hod) dapisać dysiertacyju.
Pa Virdžynii Vułf u mianie byŭ dypłom, ja vielmi lublu hetuju aŭtarku za styl napisańnia i temy, jakija jana padymaje. Uvohule, čytańnie — heta najlepšy adpačynak dla mianie, kali na jaho jość čas.
Słuchaŭki
Ja vielmi lublu chadzić pieššu — heta taksama adzin sa sposabaŭ adpačynku, pierachod z pracoŭnaha stanu ŭ bolš raźniavoleny. Zvyčajna ŭ hety momant zaŭsiody słuchaju muzyku.
U płejery roznyja styli, chiba što rep nie pa dušy. Šanuju Bi-2, ź biełaruskaha apošnim časam słuchała Šumu, dosyć praciahły čas — Lavona Volskaha.
Teatralnaja prahramka
Voś užo 15 hod jana simvalizuje dla mianie važnuju častku majho žyćcia. «Kufar-2018» praciahniecca da 27 vieraśnia, tak što ja mahu paraić niekalki śpiektaklaŭ z prahramy da prahladu.
24 vieraśnia
U hety dzień raju naviedać iranski siurrealistyčny śpiektakl «Mama Jerma». Jon z elemientami kłaŭnady. Chaču adznačyć, što iranski teatr u pryncypie vielmi cikavy. Da nas štohod pryjazdžajuć irancy, i kožny raz heta novyja hrupy, jak kłasičnyja, tak i ekśpierymientalnyja.
U hety ž viečar budzie iści płastyčnaja pastanoŭka «Inšyja» ad teatra «Kišeń» z Kiemierava. Vielmi cikava zroblenaja.
25 vieraśnia
Abaviazkova pahladzicie śpiektakl «Zabojstva» teatra ź Izraila. Pjesa sučasnaha dramaturha raspaviadaje pra kanflikt pamiž izrailcianami i arabami. Jana idzie na dźviuch movach: na arabskaj i iŭrycie. Heta antyvajennaja pastanoŭka vusnami maładzionaŭ, jakija dajuć zrazumieć, što bratazabojstva varta spynić.
26 vieraśnia
Rekamienduju taksama schadzić na śpiektakl «Aśviencym» ź Piciera — dobraja pastanoŭka. I vielmi charakterna, što maładych ludziej chvalujuć takija surjoznyja temy.
