Anatol Labiedźka znajšoŭ novuju pracu
Ciapier Anatol Labiedźka staŭ zasnavalnikam i dyrektaram ustanovy «Jeŭrapiejski dyjałoh».
Labiedźka, jaki jašče da lipienia byŭ staršynioj palityčnaj partyi AHP, staŭ dyrektaram novaj ustanovy. Što ž heta za novaja arhanizacyja? «Ubačycie pa spravach», — adrazu adkazvaje Labiedźka.
Pa jahonych słovach, «Jeŭrapiejski dyjałoh» na 2019 hod rychtuje try bujnyja kanfierencyi. «Heta budzie niezaležnaja placoŭka, svabodnaja ad cenzury. U nas isnuje «Minski dyjałoh», ale jon nabližany da ŭładaŭ, tamu arhanizatary aściarožnyja ŭ vybary temaŭ i ŭdzielnikaŭ. U nas nie budzie nijakaj cenzury i samacenzury», — kaža Labiedźka.
Na jakija ž temy projduć kanfierencyi? «Biełaruska-rasijskija adnosiny nie z kalidoraŭ ułady, a pohlad zboku. Budzie zaprošanaja vialikaja kolkaść rasijskich niezaležnych ekśpiertaŭ. Paśla heta tema «Biełaruś i NATO». Nam treba havaryć pra hetuju arhanizacyju. Nu i treciaja tema — ekanomika, chočam pryvieźci ekśpiertaŭ z susiednich dziaržavaŭ, jakija praviali ŭ svaich krainach udałyja ekanamičnyja reformy», — raskazvaje palityk.
Niekalki drabniejšych mierapryjemstvaŭ pad ehidaj «Jeŭrapiejskaha dyjałohu» mohuć adbycca ŭžo sioleta. Naprykład, sieminar pa vybarčym zakanadaŭstvie, ab roŭnaści mužčyn i žančyn. «Taksama my chočam vyjści na małyja harady, dzie niama partyjnych struktur, ŚMI, hramadskich arhanizacyj, i tam vučyć ludziej razmaŭlać, pavodzić siabie z pradstaŭnikami viertykali».
Dziaržaŭnuju rehistracyju «Jeŭrapiejski dyjałoh» atrymaŭ jašče ŭ sakaviku, a ŭ žniŭni byŭ adkryty bankaŭski rachunak. Labiedźka ŭpeŭnieny, što zdolny pravodzić efiektyŭnyja kampanii pa fandrajzinhu (zboru achviaravańniaŭ) — heta i budzie krynicaj finansavańnia arhanizacyi.