Ubačyć pryhažość Biełarusi — 5 maršrutaŭ pa krainie dla vosieńskaha ŭik-endu
Finišavaŭ letni siezon, bulbu vykapali. Da nadychodu chaładoŭ zastajecca jašče para-trojka vychodnych z adnosna niebłahim vosieńskim nadvorjem, kab pryśviacić ich čamuści cikavamu. Naprykład, vandroŭkam pa Biełarusi. Razam z servisam anłajn-braniravańnia adpačynku ŭ Biełarusi vetliva.by my skłali piać cikavych maršrutaŭ na vychadnyja.
Maršrut 1: Zamkavy
Niaśviž — Mir — Navahrudak — Lida — Muravanka — Parečča (načoŭka) — Hrodna
Pačynajem z davoli standartnaha maršruta, da jakoha my dadali jašče niekalki čekpojntaŭ. Pamiž dźviuma najbolš viadomymi turystyčnymi punktami Biełarusi lažyć usiaho 30 kiłamietraŭ, tamu zvyčajna vizit u Mir abjadnoŭvajuć z ekskursijaj pa pałacy ŭ Niaśvižy, i naadvarot.
Raskazać niešta novaje pra abjekty spadčyny JUNESKA vam zmohuć tamtejšyja ekskursavody. U Niaśvižy i Miry ŭvieś čas imknucca ŭdaskanalić servis, tamu tam na miescy zmožacie paśla ekskursii padsiłkavacca, a taksama nabyć suvieniry.
Paśla Mira prapanujem vam skiravacca ŭ bok pieršaj stalicy VKŁ — Navahrudka. Ruiny staražytnaha zamka, mahutnyja chramy, spadčyna Adama Mickieviča — usio heta možna pahladzieć tam, dzie niekali Mindoŭh pakłaŭ pačatak Vialikamu Kniastvu Litoŭskamu.
Dalej rušym u Lidu — miesca stanovicca ŭsio bolš papularnym dziakujučy miascovamu piennamu napoju. Možna zavitać u zamak, zbudavany pa daručeńni Hiedymina, a taksama pašpacyravać pa pryhožych lidskich vułačkach.
Panarama Lidy.
U tryccaci kiłamietrach ad Lidy znachodzicca vioska Muravanka. Tam staić carkva Rastva Baharodzicy — piacisothadovy pomnik abarončaha chramabudaŭnictva. Taŭščynia ścien carkvy — ad 1 da 1,8 mietra, što dazvoliła chramu vystajać piać socień hadoŭ.
Niepadalok, u Žałudku, znachodzicca zakinuty Pałacava-parkavy kompleks Śviatapołk-Čaćviarcinskich. Lubicie atmaśfieru filmaŭ žachaŭ? Možacie naviedać taksama.
Dzie pieranačavać: raim ahrasiadzibu «Mara», što mieścicca ŭ Pareččy. Tam ža, darečy, možna pałasavacca znakamitymi pareckimi tortami, a taksama pahladzieć na karunkavy budynak čyhunačnaj stancyi.
Druhi dzień vandroŭki raim pryśviacić Hrodnu — adnamu z najbolš pryhožych, karaleŭskamu horadu Biełarusi, dzie zachavałasia zvyš 400 abjektaŭ historyi i architektury. Pra Hrodna možna raskazvać biaskonca, ale varta adnojčy ŭziać i samomu naviedać staražytny horad.
Karta maršrutu:
Maršrut 2: Chramy Zachodniaj Biełarusi
Rakaŭ — Kreva — Kušlany — Soły — Hierviaty — Śvir — Narač (načleh) — Miadzieł — Budsłaŭ
Pačynajem vandroŭku z Rakava, što na Vałožynščynie, — staražytnaha miastečka, apietaha Siarhiejem Piasieckim jak ulubionaje miesca kantrabandystaŭ 20—30-ch hadoŭ minułaha stahodździa. Siońnia tut možna pahladzieć nieahatyčny kaścioł i były kaścioł daminikanaŭ, u jakim ciapier dziejničaje pravasłaŭny chram.
Rakaŭ.
Ruchajemsia dalej na paŭnočny zachad krainy. Usiaho 60 kiłamietraŭ trasaj M7 — i vy ŭ Krevie, miescy siaredniaviečnych žarściaŭ, dzie była padpisanaja Kreŭskaja ŭnija, što abjadnała VKŁ i Karaleŭstva Polskaje ŭ adnu dziaržavu. Siońnia pra tyja časy nahadvajuć vieličnyja ruiny zamka. Jaho akurat pačali adbudoŭvać.
Dalej biarom kurs na Astravieččynu. Pa darozie ŭ Kušlanach možna naviedać siadzibu, dzie Francišak Bahuševič pravioŭ apošnija hady svajho žyćcia, a ŭ Sołach — pahladzieć na madernovy kaścioł Maci Božaj Ružancovaj. Jaho razynka — freski sa scenami razhromu balšavikoŭ na Viśle ŭ 1920 hodzie.
Soły.
U Hierviatach, niepadalok ad jakich budujuć atamnuju elektrastancyju, mieścicca kaścioł Najśviaciejšaj Trojcy — nieahatyčny skarb Biełarusi. Chram nazyvajuć «maleńkaj Šviejcaryjaj» i «biełaruskim Notr-Damam». La jaho — łandšaftny park z redkimi dekaratyŭnymi raślinami i fihurami apostałaŭ.
Hierviaty.
Kali zachapleńnie ad pryhažości kaścioła daść vam zrušycca ź miesca i praciahnuć padarožža, kirujciesia ŭ bok voziera Narač. Praź Michališki, u jakich staić chram 17-ha stahodździa — jaki zachavaŭ duch i charaktar taho času, — vy trapicie ŭ Śvir, dzie možna ŭzyści na vysačeznaje haradzišča Daŭmonta, ź jakoha adkryvajecca fantastyčny krajavid, sfatahrafavacca la nieabaročnaha kaścioła Śviatoha Mikałaja, a taksama prajścisia ŭzdoŭž bieraha Śvirskaha voziera staravierskaj vulicaj.
Z druhoha boku voziera staić inšy kałarytny kaścioł — u Zaśviry.
Paśla hetaha možna jechać adpačyvać. Miescaŭ dla načoŭki na bierazie Naračy vielmi šmat, ale my raim etnakulturny kompleks «Nanosy-Navasielle» na adnym z žyvapisnych paŭvostravaŭ, a taksama siadzibu RespectHouse na malaŭničym voziery Miadzieł.
U druhi dzień varta naviedać horad Miadzieł, dzie zachavaŭsia staražytny kaścioł karmielitaŭ, a paśla zajechać u Budsłaŭ, dzie znachodzicca adna z najbolš šanavanych katalickich śviatyniaŭ Biełarusi — Budsłaŭski abraz Maci Božaj. Štohod da budsłaŭskaha kaścioła ładziać pilihrymki. Płošča pierad kaściołam advieku nazyvajecca Krasnaj (heta značyć, pryhožaj), a jašče na mohiłkach u Budsłavie pachavanaja Paŭlina Miadziołka — pieršaja vykanaŭca roli kupałaŭskaj Paŭlinki.
Karta maršruta:
Maršrut 3: Na paŭdniovy zachad Biełarusi
Kosava — Ružany — Kamianiec — Biełaviežskaja pušča — Kaščeniki (načleh) — Brest — Synkavičy — Žyrovičy
Pieršy punkt paŭdniova-zachodniaha padarožža — Kosava. Ruchajciesia pa «alimpijcy» da Ivacevičaŭ, a potym zvaročvajcie na Kosava, dzie staić šykoŭny pałac Pusłoŭskich. Słonimski paviatovy maršałak Vojciech Pusłoŭski raźvivaŭ pramysłovaść i budavaŭ suknavalni z paravymi mašynami, młyny, brovary, darohi. Byŭ miecenatam, fundavaŭ chramy. Šykoŭny Kosaŭski pałac byŭ rezidencyjaj rodu.
Kosava.
Pobač z pałacam staić rekanstrujavany falvarak, dzie naradziŭsia nacyjanalny hieroj Biełarusi Tadevuš Kaściuška. Aryhinalnaje zbudavańnie zhareła ŭ Pieršuju suśvietnuju, adnaŭlali jaho pa malunkach Napaleona Ordy.
Kali ruchacca ŭ bok Hrodna, to nastupnym čekpojntam maršrutu stanuć Ružany. Tut znachodziłasia rezidencyja Sapiehaŭ, dzie prymali karaloŭ Rečy Paspalitaj i dzie niekali znachodziŭsia skarb VKŁ. Taksama ŭ Ružanach varta zirnuć na staražytnyja katalicki i pravasłaŭny chramy.
Ružany.
Praz Pružany traplajem u Kamianiec, dzie znachodzicca taja samaja Biełaja Vieža. 30-mietrovaje abarončaje zbudavańnie z taŭščynioj ścien 2,5 mietra staić na varcie ŭžo bolš za 730 hadoŭ. Niekali jaje pamyłkova pabialili tynkoŭkaj, ale siońnia vieža vyhladaje mienavita tak, jak niekali ŭ XIII stahodździ.
Zusim pobač z Kamiancom znachodzicca Biełaviežskaja pušča — adzin z najvialikšych i staražytniejšych lasoŭ u Jeŭropie i abjekt suśvietnaj kulturnaj spadčyny JUNESKA. Pušča słavicca najvialikšaj na kantyniencie papulacyjaj zubroŭ, jakich stahodździe tamu ledź nie vyniščyli.
Na terytoryi nacyjanalnaha parka znachodziacca lasny zaapark, muziei pryrody i narodnaha pobytu, a taksama rezidencyja biełaruskaha Dzieda Maroza. Taksama možna ŭziać naprakat rovary i zładzić viełašpacyr, padychać lasnym pavietram.
Zanačavać prapanujem u ahrasiadzibie «Valeryja», što znachodzicca ŭ vioscy Kaščeniki. Dva haściavyja damy mohuć źmiaścić da 20 čałaviek, a na miascovaj kuchni možna pakaštavać šedeŭry kulinaryi, jakija pryhatujuć prosta da vašaha pryjezdu.
Druhi dzień padarožža možna pačać z vandroŭki ŭ Brest — tut sapraŭdy šmat na što možna pahladzieć. Abaviazkova naviedajcie Bresckuju krepaść dy pašpacyrujcie pa piešachodnaj Savieckaj vulicy.
Na advarotnym šlachu možna naviedać Žyrovičy, dzie znachodzicca pravasłaŭny Uśpienski manastyr, a taksama viosku Synkavičy z samym staražytnym abarončym chramam u Biełarusi.
Žyrovičy.
Karta maršruta:
Maršrut 4: Da paŭnočnych azioraŭ
Hłybokaje — Mosar — Brasłaŭ (načleh) — Miory — Połack
Varta taksama pravieści chacia b adzin uik-end u padarožžy pa poŭnačy Biełarusi. Pa viciebskaj trasie dajazžajem da Biahomla, tam nakiroŭvajemsia ŭ bok Hłybokaha.
Hłybokaje — heta nie tolki horad zhuščanaha małaka, ale i višniovaja stalica Biełarusi. Štohod letam tut ładziać višniovyja festy, jahada ŭžo stała miascovym brendam. Navat jość zhuščonka sa smakam «čery-brendzi». Da ŭsiaho, Hłybokaje — prosta vielmi ŭtulny haradok ź vietlivymi žycharami.
U Hłybockim rajonie jość vioska Mosar, jakaja stała viadomaj dziakujučy dziejnaści miascovaha ksiandza Juzafa Bulki. Jon šmat čaho zrabiŭ dla Mosara: pa jaho inicyjatyvie ŭ vioscy byŭ stvorany kryžovy šlach, stadyjon, strausinaja fierma, dendrapark, pierad kaściołam Śviatoj Hanny ŭźviedzieny pomnik Janu Paŭłu II.
Mosar.
Praz Šarkaŭščynu dabirajemsia da Brasłava, dzie možna zanačavać. Prapanujem adrazu čatyry varyjanty: ahraekasiadzibu «Chutar Jodziški», bazy adpačynku «Zołava» i «Lavoški», a taksama turkompleks «Dryviaty».
Na druhi dzień pa trasie R14 praź Miory (dzie možna spynicca la kaścioła sa špilami, nie horšymi, čym u chrama ŭ Sołśbiery) nakiroŭvajemsia ŭ staražytny Połack.
Najstarejšy horad Biełarusi dahetul zachoŭvaje šmat histaryčnych cikavostak: najpierš Safijski sabor i Spasa-Jeŭfrasińnieŭski manastyr, dzie spačyvaje śviataja Jeŭfrasińnia Połackaja.
Kaliści ŭ Połacku naradziŭsia Francišak Skaryna, a siońnia ŭ horadzie isnuje vielmi bahaty muziej knihadruku.
Karta maršruta:
Maršrut 5: Dva ŭ adnym
Mahiloŭ — Škłoŭ — Orša — Viciebsk
U apošnim našym maršrucie prapanujem naviedać adrazu dva abłasnyja centry.
Mahiloŭskaja ratuša.
Ivan Łuckievič niekali nazvaŭ Mahiloŭ biełaruskaj Prahaj. U pačatku 20-ha stahodździa hety horad sapraŭdy moh nahadvać stalicu Čechii praz kolkaść kultavych zbudavańniaŭ: bolš za 20 cerkvaŭ, kaścioły, kirchi i sinahohi. Na žal, druhaja suśvietnaja vajna razam z savieckim časam pakinuli naščadkam nie tak i šmat, ale i hetaha chopić, kab palubić Mahiloŭ.
Budynak dramatyčnaha teatra.
Siarod mahiloŭskich słavutaściaŭ — vieličny kaścioł Śviatoha Stanisłava, budynak dramatyčnaha teatra, kopija minskaha Doma ŭrada, mastacki muziej (jaho jašče možna pabačyć na 200-rublovaj kupiury) i adziny ŭ śviecie pomnik astrołahu.
Dalej nakiroŭvajemsia ŭ Škłoŭ, dzie, miž inšym, jość navat pomnik ahurku. A z «inšaha» — škłoŭskaja ratuša, Spasa-Praabraženskaja carkva i adzin z najlepšych u krainie parkaŭ, jaki byŭ zakładzieny ŭ kancy 19-ha stahodździa.
Škłoŭskaja ratuša.
Pamiž Škłovam i Oršaj znachodzicca taja samaja Aleksandryja, dzie možna spynicca na niekalki chvilin. Pobač z ahraharadkom jość krynica. Kab trapić da jaje, treba vyjechać z Aleksandryi i ruchacca pa novaj nasypnoj hraviejcy ŭzdoŭž raki, mima viertalotnaj placoŭki. La krynicy jość nievialičkaja parkoŭka mašyn na piać.
Siarod cikavostak Oršy — jezuicki kalehium, jaki pamiataje Napaleona i Stendala, vializny Rahvałodaŭ kamień, vadziany młyn, kaścioł z kopijaj karciny «Bitva pad Oršaj» i spadčyna Uładzimira Karatkieviča.
Aršanski kalehium.
Spyniajemsia na adpačynak u Viciebsku — vetliva.by prapanuje niekalki varyjantaŭ. Siły spatrebiacca, kab druhi dzień pryśviacić paŭnočnaj stalicy Biełarusi.
Centr Viciebska možna abyści pieššu, transpart nie spatrebicca. Špacyr pačynajcie z prahułki pa płoščy Tysiačahodździa. Tut staić rekanstrujavany chram Błahavieščańnia — pieršy kamienny budynak u Viciebsku, razburany ŭ saviecki čas i adnoŭleny ŭ niezaležnaj Biełarusi. Pobač z chramam — kamień u honar 2000-hodździa chryścijanstva.
Praz darohu staić słavuty Nacyjanalny akademičny dramatyčny teatr imia Jakuba Kołasa, adtul pačynajecca doŭhaja piešachodnaja zona. Vysokaja leśvica viadzie ŭvierch da samaha vialikaha viciebskaha chrama — Uśpienskaha sabora. Naprava ad leśvicy — vulica Tałstoha z zabudovaj kanca 19-ha — pačatku 20 stahodździa.
Uśpienski sabor.
Na Ratušnaj płoščy staić Ratuša — aŭtentyčny budynak 18-ha stahodździa. Pobač — šykoŭny prykład vilenskaha baroka — Uvaskrasienskaja carkva. Nasuprać jaje znachodzicca honar kožnaha vićbiča — konny pomnik vialikamu kniaziu Alhierdu.
Ratuša.
Viciebsk viadomy ŭłasnaj mastackaj škołaj. La jaje vytokaŭ stajali Mark Šahał, jaho nastaŭnik Judal Pen, Kazimir Malevič, El Lisicki, Viera Jermałajeva, Mikałaj Suecin, Illa Čašnikaŭ i mnohija inšyja. Zachavaŭsia budynak, dzie naradžalisia idei mastakoŭ. U apošni čas naščadki stali bolš uvažlivymi da Marka Šahała, i ŭ horadzie źjavilisia muziei i pomniki, pryśviečanyja znakamitamu ziemlaku.
Šahał, darečy, nazyvaŭ Viciebsk maleńkim Paryžam. Ale siońniašni Viciebsk — admietny horad, jaki varta naviedać kožnamu biełarusu.
Karta maršruta:
Prapanoŭvajcie svaje maršruty dla vandrovak pa Biełarusi ŭ kamientarach!
