Nieaficyjna: ciahniki Minsk — Vilnia spynili ŭ Hudahai, bo paličyli za vybuchoŭku schovanku dla kantrabandy
Fota belsat.eu.
Ciahniki Minsk — Vilnia adpraŭleńniem 7.35 i 8.10 ź Minska siońnia spynili na stancyi Hudahaj, pasažyraŭ vysadzili. Pryčyna — padazronaja skrynka ŭ adnym z vahonaŭ. Pra zdareńnie paviedamili NN čytačy.
«Ja jechaŭ a 7.35 ź Minska, ale spynili, potym ciahnik, jaki idzie ź Minska ŭ 8.10, — taksama. Niejkaja skrynia padazronaja, milicyja i rajvykankam robiać usie mahčymaje, kab ludziej da miažy dastavić — aŭtobusami, maršrutkami. Ludzi, jakim treba na roznyja samaloty, kidajucca, što dzikija lvy», — napisaŭ nam čytač Andrej.
Heta adbyłosia paśla prachodžańnia pašpartnaha i mytnaha kantrolu. Znajšli padazronuju skrynku, vyklikali śpiecyjalistaŭ ź Minska. Ciahnik adahnali ad stancyi. Siarod pasažyraŭ była i žurnalistka telekanała Biełsat Volha Čajčyc.
Ruch čyhunačnaha transpartu ŭ punkcie propusku Hudahaj adnaviŭsia praz 2,5 hadziny paśla vyjaŭleńnia padazronaha pradmieta. Znojdzienaja ŭ ciahniku Minsk — Vilnia skrynka nie ŭjaŭlaje niebiaśpieki, skazaŭ tut.by pradstaŭnik Dziaržaŭnaha pamiežnaha kamiteta Biełarusi Anton Byčkoŭski.
Pavodle nieaficyjnaj infarmacyi pasažyraŭ, była znojdziena schovanka šmatrazovaha vykarystańnia dla zachoŭvańnia i pieravozki cyharet. «Sam bačyŭ. Była vialikaja skrynka z dratami. I błoki cyharet», - apisaŭ znachodku pasažyr ciahnika. Byčkoŭski nie paćvierdziŭ hetuju infarmacyju.
Bolšaść pasažyraŭ ciahnika dačakalisia skančeńnia pravierak i praciahnuli pajezdku. «Niekatorych pasažyraŭ ciahnika dastavili słužbovym transpartam pahrankamiteta ŭ punkt propusku Łoša i jany pierajšli miažu pa ŭzhadnieńni ź litoŭskim bokam u piešym paradku. Niekalki čałaviek viarnulisia nazad u Minsk. Astatnija čakali ciahnika», - udakładniŭ Byčkoŭski.