Mieduniviersitet patrabuje 980 rubloŭ sa studentki, jakaja vałancioryła ŭ Hvatemale
Fota: facebook.com/hanna.plotnitskaya
Miedyčny ŭniviersitet patrabuje sa studentki, jakaja dva miesiacy pracavała vałanciorkaj u Hvatemale, zapłacić 980 rubloŭ za adpracoŭki prapuščanych zaniatkaŭ i praktyki. 14 vieraśnia Hanna Płatnickaja była ŭ rektaracie, dzie joj paćvierdzili: vałanciorskaja praca ŭ haračaj kropcy — niaŭvažlivaja pryčyna dla propuskaŭ, piša «Jeŭraradyjo».
Adpracoŭki prapuščanych zaniatkaŭ u BDMU płatnyja. Adpracoŭka adnoj akademičnaj hadziny kaštuje 5 rubloŭ 70 kapiejek. Za 144 prapuščanyja hadziny praktyki dziaŭčynie naličyli 820 rubloŭ, i jašče 160 — za piać dzion prapuščanych zaniatkaŭ.
«Mnie skazali, što heta maje ŭłasnyja prablemy, i treba vypłočvać, bo pryčyna propuskaŭ nie z'ŭlajecca ŭvažlivaj, — raspaviała Jeŭraradyjo Hanna Płatnickaja, jakaja pakul jašče vučycca na 4 kursie BDMU. — Usie spasyłajucca na novy zakon pa płatnaj adpracoŭcy pry propuskach, jaho pryniali adnosna niadaŭna. Padajecca, ja pieršaja, chto budzie płacić. Ale ŭsie šakavanyja takoj vialikaj sumaj: amal $500 atrymlivajecca!»
980 rubloŭ — vialikaja suma dla dziaŭčyny, tamu pytańnie praciahu navučańnia ŭ BDMU dla jaje zastajecca adkrytym.
Hanna Płatnickaja pracavała jak małady miedyk-vałancior u klinicy Health&Help, jakaja znachodzicca ŭ vioscy Čuinachtachujub u Hvatemale. Źviestki pra hetuju vałanciorskuju prahramu drukavaŭ, u pryvatnaści, biełaruski interniet-časopis «34 travel».
Hanna vyjechała tudy 2 lipienia, kali navučalny hod jašče išoŭ, ale, pa jaje słovach, damoviłasia pra svaju adsutnaść z dekanatam. Pra heta jana napisała ŭ sumnym dopisie, jaki pakinuła ŭ Instagram:
«Pa mierkach biełaruskaj sistemy adukacyi ja niejkaja idyjotka. Papierłasia čort viedaje kudy, u niejkuju Hvatemału, pracavać u kliniku, dzie nie płaciać. «Ničoha nikomu nie skazała» (nu viadoma ž ja skazała i prasiła pieranos, ale moj dekanat vielmi chacieŭ prykryć svoj zad). Zaraz ad mianie chočuć płatnych adpracovak za ŭsio, a heta prykładna $450.
Baćki chvalujucca, a mnie vielmi sumna, što ja sa svaimi dobrymi matyvami sustrakaju voś taki vodhuk u tak zvanaj alma mater».
