Byłoha kamandzira rasijskaha vajskovaha abjekta ŭ Biełarusi abaviazali vypłacić 3 miljony dalaraŭ
U Rasii sud zadavoliŭ pazoŭ Ministerstva abarony na amal 3 miljony dalaraŭ da byłoha kamandzira čaści № 03522. Jana znachodzicca ŭ Kleckim rajonie Biełarusi, jaje arandujuć rasijskija Uzbrojenyja siły. Vyśvietliłasia, što paru hadoŭ kamandzir padpisvaŭ dakumienty ab nibyta praviedzienym tam ramoncie. Padrabiaznaści paviedamlaje vydańnie «Kommiersant».
Vajenny sud zadavoliŭ isk Minabarony RF na biesprecedentnuju sumu — 201,5 młn rasijskich rubloŭ (amal 3 młn dalaraŭ u ekvivalencie) da Vitala Martynava. Jon byŭ kamandziram vajskovaj častki № 03522, jakaja kiruje rasijskaj radyjołakacyjnaj stancyjaj «Vołha» ŭ Kleckim rajonie.
Baza była stvorana jašče ŭ časy SSSR dla papiaredžańnia rakietnych napadaŭ i vykarystoŭvajecca Rasijaj na pravach doŭhaterminovaj arendy.
U 2012 hodzie rasijskaje AAT «Słavianka» ŭziało na siabie padrad pa ramoncie žyłoha haradka pry v/č za niekalki kiłamietraŭ ad Hancavičaŭ. Za dva hady pamiž pradstaŭnikami firmy i kamandziram byli padpisanyja dziasiatki aktaŭ ab pryjomie ramontna-budaŭničych rabot na miljony rubloŭ, choć jany vykanany nie byli.
Aficera sudzili za złoŭžyvańnie słužbovymi paŭnamoctvami, akramia materyjalnych pretenzij jon taksama asudžany na 4 hady ŭmoŭna. Pry hetym karupcyjnaha składnika śledstva nie ŭstanaviła, i, zhodna zabvinavačvańniem, Martynaŭ złoŭžyvaŭ nie z karyści, a dziela karjery — «žadajučy stvaryć pierad kiraŭnictvam bačnaść sumlennaha vykanańnia abaviazkaŭ».
Hetaja sprava stała adnym z epizodaŭ u kryminalnaj historyi AAT «Słavianka», ź jakoj sudy raźbirajucca da hetaha času. Raniej hiendyrektar firmy byŭ prysudžany da 11 hadoŭ źniavoleńnia i štrafu ŭ 500 miljonaŭ rasijskich rubloŭ.
