The Atlantic: Nie treba bajacca rasijskaj armii — jana nie ŭ stanie vieści sapraŭdnuju vajnu
Rasija nie ŭ stanie vieści sapraŭdnuju vajnu, miarkuje zachodni analityk Mark Haleoci.
Hałoŭnaja meta čarhovych rasijskija vučeńniaŭ — heta pryhožaja fotasiesija, miarkuje analityk Mark Haleoci ŭ artykule, jaki źmiaščaje na hałoŭnaj staroncy amierykanski časopis The Atlantic.
Mark Haleoci źjaŭlajecca staršym daśledčykam Instytuta mižnarodnych adnosinaŭ u Prazie, raniej jon uznačalvaŭ Centr jeŭrapiejskaj biaśpieki hetaha instytutu. U svoj čas jon, pavodle staronki ŭ Vikipiedyi, čytaŭ lekcyi ŭ maskoŭskim MHIMO.
Nižej pryvodzim asnoŭnyja dumki, vykładzienyja im u artykule.
Armiju nie paśpiejuć sabrać
Ličby ŭdzielnikaŭ vučeńniaŭ uražvajuć: 300 tysiačaŭ čałaviek asabovaha składu, 36 tysiač tankaŭ i inšych vajennych mašyn, 80 karabloŭ i tysiača latajučych aparataŭ, jakija ściahnuli na ŭschod Rasii z pałovy terytoryi krainy. Heta ŭdvaja bolš za ŭsie ŭzbrojenyja siły Vialikabrytanii. Plus 3200 vajskoŭcaŭ dy 30 samalotaŭ z KNR, a taksama nievialiki atrad z Manholii.
Maštab vučeńniaŭ u peŭnym sensie raskryvaje słaby bok rasijskaj abarony — u vypadku sapraŭdnaha kanfliktu takuju armadu prosta nie paśpiejuć sabrać razam. Čyhunačnyja darohi i asnoŭnyja vuzły kamunikacyjaŭ patrapiać pad hałoŭny pieršy ŭdar.
Fotašou dla Zachadu
Padčas vučeńniaŭ buduć razyhryvać vajnu na ziamli i ŭ niabiosach, źniščać ujaŭnych terarystaŭ i vučycca źbivać kryłatyja rakiety. Ale samaje hałoŭnaje budzie ŭ finale — palavy ahlad vojskaŭ i fotasiesija, padčas jakoj reparciory z usiaho śvietu buduć zdymać biaskoncyja šerahi sałdataŭ i ŭzbrajeńnia.
Aŭtar nazyvaje heta dypłamatyjaj u styli «chevi-metał». Demanstrujučy svaju armiju, Rasija sprabuje spužać i ŭvieści ŭ zman Zachad.
Ličby ŭdzielnikaŭ zavyšanyja
Na minułahodnich vučeńniach «Zachad» Maskva štučna zaniziła kolkaść udzielnikaŭ, kab zachodnija krainy nie mahli dasłać tudy paŭnamaštabnyja inśpiekcyi pavodle praviłaŭ ABSIE, miarkuje aŭtar. Ale hetym razam Rasija achvotna zavyšaje ličby.
Šyroka razrekłamavanaja ličba 300 tysiač — heta vynik niedakładnaha padliku, miarkuje Mark Haleoci. «Nasamreč kolkaść udzielnikaŭ bližej da 150,000, chacia i hetaja ličba mocna ŭražvaje». Kali zrabić paralel z vučeńniami «Zachad», to šmat chto z hetych vajskoŭcaŭ naŭrad ci ŭvohule pakinie svaje kazarmy. Ich pryciahnuć da vučeńniaŭ na kamandnych punktach — u pole jany vychodzić nie buduć.
Kitajcy jak schavany sihnał Zachadu
Dazvoliŭšy ŭdzieł kitajcaŭ u vučeńniach na ŭłasnaj terytoryi, Rasija, na pieršy pohlad, žadaje pakazać Zachadu, što zmoža damaŭlacca ź inšymi krainami, kali sankcyjny i dypłamatyčny cisk budzie praciahvacca. Ź inšaha boku, udzieł vojskaŭ KNR byŭ čysta simvaličny. Takim čynam Maskva, vierahodna, daje zrazumieć, što nie žadaje źviazvać sabie ruki aljansam z Kitajem. Ale, maŭlaŭ, kali budziecie davić na nas zanadta mocna, to ŭ nas nie budzie inšaha vyjścia.