Milicyja šukaje traich vychavancaŭ śpiecvučylišča ŭ Mahilovie, jakija ŭciakli z pravasłaŭnaha łahiera ŭ Smalenskuju vobłaść FOTA
Troje vychavancaŭ śpiecvučylišča № 2 u Mahilovie ŭciakli z łahiera, pierasiekli miažu Biełarusi i chavajucca na terytoryi Smalenskaj vobłaści, paviedamili va UUS Mahabłvykankama. Milicyja apublikavała fota i prykmiety padletkaŭ.
Fota: UUS Mahabłvykankama
Navučency Mahiloŭskaha dziaržaŭnaha śpiecyjalnaha prafiesijna-techničnaha vučylišča № 2 drevaapracoŭki 30 žniŭnia 2018 hoda samavolna syšli z terytoryi padletkavaha łahiera «Adradžeńnie» pry Mahiloŭskaj jeparchii Mścisłaŭskaha rajona. Paśla hetaha padletki naŭmysna vyjechali na terytoryju Smalenskaj vobłaści Rasijskaj Fiederacyi. Padletki chavajucca ad supracoŭnikaŭ orhanaŭ unutranych spraŭ i ŭchilajucca ad prachodžańnia navučańnia ŭ śpiecustanovie.
Jak raspavioŭ TUT.BY dyrektar śpiecvučylišča Vital Lebiedzieŭ, padletkam pa 17 hadoŭ. Siarod ich — adzin z tych, chto ŭžo ŭciakaŭ raniej i ciapier prachodzić paciarpiełym pa spravie suprać eks-kiraŭnikoŭ SPTU, jakich vinavaciać u źbićci navučencaŭ. Dyrektar śpiecvučylišča padkreśliŭ, što dvoje padletkaŭ nieŭzabavie pavinny byli pakinuć SPTU, ale «adzin ich padbiŭ na ŭcioki».
Jankoŭski Ivan Leanidavič (na fota źleva), 08.01.2001 h.n., raniej pražyvaŭ u a.Abuchava Vierchniadźvinskaha rajona Viciebskaj vobłaści, raniej sudzimy za kradziež majomaści. Prykmiety: na vyhlad 15—18 hadoŭ, rost 170 sm, siaredniaha ciełaskładu, vočy zialonyja, vałasy ciomnaha koleru, brovy duhapadobnyja.
Tałkačoŭ Dźmitryj Vasiljevič (na fota ŭ centry), 07.12.2000 h.n., raniej pražyvaŭ u v. Kupiacičy Pinskaha rajona Bresckaj vobłaści, raniej sudzimy za kradziež majomaści. Prykmiety: na vyhlad 14—17 hadoŭ, rost 160 sm, siaredniaha ciełaskładu, vočy błakitnyja, vušy adtapyranyja, vałasy rusyja, brovy duhapadobnyja. Asablivyja prykmiety: na ŭnutranym baku levaha ściahna majecca radzimy znak, na vonkavym baku kiści pravaj ruki šnar ad apioku daŭžynioj kala 4 sm.
Budźko Vital Uładzimiravič (na fota sprava), 07.07.2001 h.n., raniej pražyvaŭ u h.p. Lelčycy Homielskaj vobłaści, raniej sudzimy za kradziež transpartnaha srodku. Prykmiety: na vyhlad 15—18 hadoŭ, rost 160 sm, chudarlavaha ciełaskładu, vočy błakitnyja, vałasy śvietłyja, brovy duhapadobnyja, śvietłaha koleru. Asablivyja prykmiety: na stopie levaj nahi tatuiroŭka ŭ vyhladzie ličbaŭ «11», na kiści levaj ruki majecca šnar ad vyviadzieńnia tatuiroŭki.
Tych, chto vałodajuć źviestkami ab kankretnym miescaznachodžańni chłopcaŭ, prosiać paviedamić va ŭpraŭleńnie kryminalnaha vyšuku UUS Mahiloŭskaha abłvykankama pa telefonach:
+375 222 295510,
+375 222 295555,
+375 33 612 98 69,
abo 102, abo ŭ bližejšaje adździeł milicyi.
