Kommiersant: Biełaruś sychodzić ad Hazpromu
Rasijskaje vydańnie «Kommiersant» analizuje mahčymaje źmianšeńnie zakupak rasijskaha hazu Biełaruśsiu na 19% paśla pačatku ekspłuatacyi Biełaruskaj AES.
Fota: Wikimedia Commons.
Vydańnie cytuje namieśnika kiraŭnika biełaruskaha Minenierha Volhu Prudnikavu, jakaja zajaviła, što Biełaruś moža da 2022 hoda źnizić spažyvańnie hazu na 3,5 miljarda kubamietraŭ u hod, abo prykładna na 18,5% paśla pačatku ekspłuatacyi Astravieckaj AES.
Adzinym eksparcioram hazu ŭ Biełaruś źjaŭlajecca «Hazprom», u 2017 hodzie pastaŭki skłali 19 miljardaŭ kubamietraŭ, piša «Kommiersant». Asnoŭny spažyviec hazu — enierhietyka (asnoŭnyja biełaruskija mahutnaści — hazavyja TES), i popyt u apošnija dziesiać hadoŭ zastajecca stabilnym — biez uliku kryzisnaha 2009 hoda ŭ dyjapazonie 19-21 miljard kubamietraŭ.
Na 2018 hod cana na haz składaje $129 za tysiaču kubamietraŭ. Heta prykładna ŭdvaja mienš, čym ciapierašniaja siaredniaja ekspartnaja cana «Hazproma» (kala $240 za tysiaču kubamietraŭ), ale ŭdvaja vyšejšaja za taryfy ŭ Rasii. Aptovaja cana «Hazproma» dla susiedniaj Smalenskaj vobłaści ciapier kala $65 za tysiaču kubamietraŭ.
«Pieršapačatkova Biełaruskaja AES pavinna była nie tolki zamiaščać unutranuju vypracoŭku TES krainy, ale i pracavać na ekspart, u takim režymie, mahčyma, źnižeńnie zakupak hazu ŭ Rasii było b nie takim maštabnym. Ale na fonie admovy Litvy i Polščy zakuplać enierhiju atamnaj stancyi i na fonie płanaŭ Prybałtyki pa vychadzie z režymu sinchronnaj pracy z enierhasistemami Rasii i Biełarusi faktyčna značnaja častka vypracoŭki vymušana budzie sychodzić na pakryćcio ŭnutranaha popytu, vyciaśniajučy hazavuju hienieracyju»,
— piša «Kommiersant».
Biełaruś źjaŭlajecca davoli vyhadnym rynkam dla «Hazproma» praź blizkaść da miažy (heta minimizuje vydatki na transpart hazu) i adsutnaść pošliny. Skaračeńnie popytu na 3,5 miljarda kubamietraŭ, zhodna z acenkaj «Kommiersanta», moža źnizić vyručku «Hazproma» na 30 miljardaŭ rasijskich rubloŭ (kala 440 miljonaŭ dalaraŭ). Ahułam dla biznesu «Hazproma» ŭpłyŭ hetaha faktaru, imavierna, budzie niaznačnym.