Jelcyn skardziŭsia Klintanu na ŭvachodžańnie Biełarusi ŭ Polšču i prasiŭ addać jamu Jeŭropu
«Naša Niva» vyvučyła niadaŭna apublikavanyja pieramovy miž Barysam Jelcynym i Biłam Klintanam na pradmiet zhadak Biełarusi.
U razmovach jana zhadvajecca nie tak i časta, niekalki razoŭ — u kantekście jadziernaj demilitaryzacyi.
Pryvodzim najbolš cikavyja cytaty:
***
Jelcyn: Skažu ščyra, Bił, kali kazać pra Polšču, to jaje padychod całkam nie adpaviadaje našamu. Bił, ja viedaju, što ŭ Polščy była vialikaja prapahandysckaja kampanija, zaklikanaja schilić biełarusaŭ da abjadnańnia z Polščaj. Jany viečna kažuć, što pierad hetym Biełaruś naležała Polščy. Taksama ja čuju, jak jany pryciahvajuć mihrantaŭ z Uschodu ŭ Polšču. Ludzi kažuć, što jany chočuć dałučycca da NATA, kab stać macniejšymi. Kažuć pra pahrozy. Ale Rasija nikomu nie pahražaje.
***
Jelcyn: Bił, Bił. Ja praciahvaju ŭ ciabie vieryć. Prašu ciabie pra adno. Prosta addaj Jeŭropu Rasii. ZŠA nie znachodziacca ŭ Jeŭropie. Jeŭropa pavinna być spravaj jeŭrapiejcaŭ. Rasija napałovu jeŭrapiejskaja i napałovu azijackaja.
Klintan: Moža ty chočaš jašče i Aziju?
Jelcyn: Viadoma, viadoma, Bił. My pra ŭsio damovimsia.
Klintan: Nie dumaju, što heta spadabałasia b jeŭrapiejcam.
Jelcyn: Usim nie. Ale ja — jeŭrapiejec. Žyvu ŭ Maskvie. Maskva ŭ Jeŭropie i mnie heta padabajecca. Možaš zabrać usie astatnija dziaržavy i harantavać ich biaśpieku. Ja ž zabiaru Jeŭropu i harantuju joj biaśpieku. Ale nie ja. A Rasija. ( …) Bił, ja surjozna. Jeŭropa nikoli nie była tak blizkaja da Rasii jak ciapier.
***
Jelcyn: Siońnia my značna prasunulisia ź Biełaruśsiu i zaklučyli damovu ź imi, aśviačonuju Patryjarcham, kab jana była viečnaj.
Jak słavianskija i pravasłaŭnyja ludzi, jak susiedzi, hety praces intehracyi ŭ nas praciahvaje ruchacca napierad. My admianili dziaržaŭnyja miežy i myty, damovilisia ab paramietrach zamiežnaha handlu. My damovilisia stvaryć śpiecyjalny nadnacyjanalny saviet i kamitet. Toje samaje adbyvajecca na bolš nizkim uzroŭni z Kazachstanam i Kyrhyzstanam. My spadziajemsia, što ŭ hetych krainach budzie palityčnaja stabilnaść, intehracyja budzie spryjać padtrymcy reformaŭ.
***
Jelcyn: Inšaja reč, jakoj ja chacieŭ by padzialicca: u nas byŭ samit SND u Maskvie, i hałoŭny vynik — my dasiahnuli razumieńnia, što nie budzie nijakaha prahresu ŭ halinie reformaŭ i niama šancaŭ madernizacyi ŭzroŭniu žyćcia biez vysiłkaŭ u napramku reintehracyi. Isnuje ŭźniosły nastroj z hetaj nahody, i jana nabiraje siłu. My budziem praciahvać hetuju liniju ź Biełaruśsiu, Ukrainaj, Kazachstanam i krainami Centralnaj Azii. Mnie vielmi škada, što niekatoryja pradstaŭniki ZŠA vykazvajuć zdahadku, što praz toje, što ja byŭ pieraabrany na treci termin u jakaści staršyni SND, Rasija demanstruje impieryjalistyčnyja tendencyi. Heta niesurjozna, ja liču, heta kryŭdna, uličvajučy dobryja adnosiny. Heta prykmieta taho, što niekatoryja ŭsio jašče chočuć zrabić raskoł pamiž nami.
***
Jelcyn: Što da SND, to my vyrašyli praciahnuć hłybiej i bolš pašyryć intehracyju, pačynajučy ŭ Biełarusi, potym Kazachstan i, u rešcie rešt, Ukraina i inšyja, tak što intehracyja budzie mieć realny sens. Byłyja respubliki Savieckaha Sajuza buduć nahadvać Jeŭrapiejskuju supolnaść. Uiljam Pery (ministr abarony ZŠA) vystupiŭ suprać hetaj idei ŭ Kazachstanie. Jon skazaŭ nie śpiašacca ź intehracyjaj. Jon prymusiŭ ich (kazachaŭ) pahadzicca ź im. Ja dumaju, što pavinna być adna palityka ZŠA — palityka prezidenta.
***
U adkaz na doŭhija intehratarskija manałohi Jelcyna Klintan, časam, vykazvaje jamu padtrymku. A taksama zaŭvažaje, što ŭ ZŠA «padobnyja adnosiny ź niekatorymi drobnymi karybskimi krainami».
***
Jelcyn: My taksama atrymali piśmovy zapyt ad Miłošaviča z prośbaj Juhasłavii dałučycca da sajuza Biełarusi i Rasii. Ja pasprabavaŭ zaciahnuć heta, i my skazali, što jašče nie hatovyja. Ale ja mahu skazać tabie, što takoha nikoli nie adbudziecca.
