Doktar Sałoškin: Usio ab pryščepkach i źmienach u biełaruskim kalendary vakcynacyi
Dziciačy doktar Źmicier Sałoškin.
Jość chvaroby, jakija «prachodziać sami», bo ich pieramahaje naš arhanizm. Jość tyja, jakija možna adoleć z dapamohaj lekaŭ. Jość chvaroby pakul nievylečnyja. A jość tyja, ad jakich možna zaścierahčysia, dziakujučy pryščepkam. Vakcynacyja — adno z najhałoŭnych vynachodnictvaŭ čałaviectva i abaviazkovaja paznaka raźvitoj krainy.
Pryščepačnyja kalendary roznych krain majuć nievialikija adroźnieńni, ale asnoŭny nabor chvarob, suprać jakich pravodzicca vakcynacyja, adnolkavy.
U Biełarusi z 2018 hoda dziejničaje novy kalandar vakcynaprafiłaktyki. Asnoŭnyja źmieny: pačatak vakcynacyi suprać dyfteryi, słupniaku, koklušu, polijamielitu i hiemafilnaj infiekcyi «pamaładzieŭ» na miesiac.
Raniej vakcynacyja pačynałasia ŭ 3 miesiacy. Vakcynacyja ad hiepatytu V pieraviedziena z 3-razovaj na 4-razovuju schiemu. Z adnaho boku, hetaja schiema dla bolš niebiaśpiečnych pa hiepatycie situacyj, ale na praktycy moža być navat bolš zručnaj dla dziciaci. Skarocicca i kolkaść pachodaŭ u palikliniku, i kolkaść ukołaŭ (kali prymianiać kambinavanyja vakcyny).
Fota: popmech.ru.
Vakcyny roznych vytvorcaŭ: u čym adroźnieńni
Vytvorcaŭ vakcyn u śviecie nie vielmi šmat. Asnoŭnyja suśvietnyja pastaŭščyki — heta francuzskaja Sanofi Pasteur MSD (Avaksim, Imavaks Polija, Tetra-, Pienta- i Hieksaksim dy inš), bielhijskaja GlaxoSmithKline Biologicals (Infanriks, Infanriks Hieksa, Chibieriks, Prioriks…), amierykanskaja Pfizer (Prievinar 13) Nievialiki pa suśvietnych mierkach, ale bujny pastaŭščyk na biełaruski rynak — rasiejskaja «NVA «Mikrahien» (BCŽ, AKDS, Ahalvak M, Encievir). Šmat hadoŭ kampanija LG Chemical LTD pastaŭlaje asnoŭnuju dla radzilniaŭ vakcynu suprać hiepatytu V — Eŭvaks.
Niahledziačy na roznych vytvorcaŭ, vakcyny suprać adnoj chvaroby całkam uzajemazamianialnyja. Raspačaŭšy vakcynacyju adnym preparatam, pry nieabchodnaści praciahnuć možna inšym.
Asnoŭnaje adroźnieńnie rasijskaj vakcyny AKDS u tym, što jana ŭtrymlivaje zabityja, ale cełyja kletki mikroba (jak, darečy, i sumnaviadomaja Eŭpienta), jaki vyklikaje kokluš. Zachodnija anałahi ŭtrymlivajuć tolki anataksin, biez samich mikraarhanizmaŭ. Dziakujučy hetamu, jany ŭ mienšaj stupieni vyklikajuć postvakcynalnyja reakcyi.
Jašče adno adroźnieńnie — kolkaść kampanientaŭ, jakija ŭvachodziać u adnu dozu vakcyny. Adnaho i taho ž efiektu možna dasiahnuć zrabiŭšy 4 abo 1 ukoł.
Naprykład, u 2 miesiacy treba vakcynavacca suprać hiepatytu V Eŭvaksam; kokluš, słupniak, dyfteryja vakcynujecca AKDS, polijamielit — Imavaksam Polija, a hiemafilnaja infiekcyja — Chibieryksam. A možna ad usich šaści infiekcyj zaścierahčysia Hieksasimam abo Infanryksam Hieksa.
Viadoma, što bolš masava dla biaspłatnaj imunizacyi zakuplajucca samyja prostyja vakcyny. Ale chaču nahadać, što ŭsia vakcynacyja pravodzicca tolki sa zhody i paśla infarmavańnia baćkoŭ abo zakonnych pradstaŭnikoŭ dziciaci i nichto nie zabaronić vam za ŭłasny košt zrabić pryščepku inšaj vakcynaj.
Jakija byvajuć uskładnieńni paśla vakcynacyi i jak dziejničać pry ich
Dziakujučy vakcynacyi vaša dzicia nie zachvareje na šerah niebiaśpiečnych i nievylečnych chvarob. Vakcynacyja musić davać baćkam adčuvańnie palohki i abaronienaści, a nie tryvohi.
Postvakcynalnyja reakcyi mahčymyja, ale redkija. Najčaściej heta adbyvajecca paśla takich vakcyn, jak AKDS (da 30% vypadkaŭ). Mienš charakterna dla Tetra- abo Hieksaksimu, Infanryksu (da 10%) abo Eŭvaksu (1—6%). Jak ni kruci, u arhanizm traplajuć mikrobnyja kletki (choć i nie žyvyja), abo ich anataksiny. Asobnaje rečyva, na jakoje moža być reakcyja — hidraokis aluminiju. Heta tak zvany depanujučy ahient, jaki ŭzmacniaje imunnuju reakcyju arhanizma i dazvalaje źnizić nieabchodnuju dla vypracoŭki imunitetu kolkaść mikrobaŭ u vakcynie.
Reakcyi padzialajucca na miascovyja (balučaść, pačyrvanieńnie, prypuchłaść miesca ŭkoła) abo ahulnyja (mlavaść, tempieratura, paharšeńnie snu, samadčuvańnia dy inš.). Prajaŭlajucca jany na praciahu 72 hadzin paśla pryščepki i ciahnucca nie bolš za 48. Zvyčajna dla taho, kab usio heta pieražyć, chapaje simptamatyčnaj terapii: šmat pitva, žarapanižalnyja leki i, hałoŭnaje, nijakich kampresaŭ na miesca injekcyi!
Kab maralna było lahčej pieražyć dzień-dva tempieratury, ujavicie, što heta zamiest troch miesiacaŭ štodzionnaha i štonočnaha kašlu, jaki ničym nielha spynić. Jaki źniasilvaje, davodzić da vanitaŭ, nie daje dziciaci spać, jeści i navat hulacca. I heta apisanaja jašče nie samaja horšaja z chvarob!
Jašče radziej sustrakajucca postvakcynalnyja ŭskładnieńni. U siarednim: 1 na 300 000. Častata postvakcynalnych uskładnieńniaŭ u sotni i tysiačy razoŭ mienšaja za častatu ŭskładnieńniaŭ padčas samoj chvaroby. Dla prykładu: ryzyka raźvićcia mlavaha paralušu paśla vakcynacyi polijamielitnaj vakcynaj mienšaja 1 na 160 000. Ryzyka ž letalnaha vyniku pry zachvorvańni na polijamielit — 5—10%.
U Biełarusi pryščepki robiacca ad nastupnych chvarob
- virusnaha hiepatytu V (u pieršyja 12 hadzin žyćcia, a taksama dzieciam va ŭzroście 2, 3, 4-ch miesiacaŭ);
- tubierkulozu (na 3—5-y dzień žyćcia);
- pnieŭmakokavaj infiekcyi (dzieciam va ŭzroście 2, 4 i 12-ci miesiacaŭ pry imunadeficytnych stanach, recydyvujučym vostrym hnojnym atycie, pnieŭmanijach, cukrovym dyjabiecie);
- dyfteryi, słupniaku, koklušu, hiemafilnaj infiekcyi (dzieciam va ŭzroście 2, 3, 4-ch miesiacaŭ);
- dyfteryi, słupniaku, koklušu — revakcynacyja ŭ 18 miesiacaŭ;
- hiemafilnaj infiekcyi (dzieciam da 5 hadoŭ pry najaŭnaści peŭnych umoŭ);
- polijamielitu (dzieciam va ŭzroście 2, 3, 4-ch miesiacaŭ i 7 hadoŭ);
- adru, epidemičnaha paratytu, krasnuchi (dzieciam va ŭzroście 12 miesiacaŭ i 6 hadoŭ);
- dyfteryi i słupniaku (va ŭzroście 6, 16, 26 hadoŭ i kožnyja nastupnyja 10 hadoŭ da ŭzrostu 66 hadoŭ);
- hrypu (dzieciam va ŭzroście ad 6 miesiacaŭ da 3 hadoŭ, dzieciam, starejšym za 3 hady, i darosłym z chraničnymi zachvorvańniami; darosłym, jakija starejšyja za 65 hadoŭ, ciažarnym, miedrabotnikam, farmaceŭtam i niekatorym inšym katehoryjam asob).
Akramia płanavych prafiłaktyčnych pryščepak, pravodzicca imunizacyja pa epidemičnych pakazańniach suprać 18-ci infiekcyj: šalenstva, bruceloz, vietranaja vospa, virusny hiepatyt A, virusny hiepatyt V, dyfteryja, žoŭtaja lichamanka, kleščavy encefalit, kokluš, adzior, krasnucha, leptaśpiroz, polijamielit, sibirskaja jazva, słupniak, tularemija, čuma, epidemičny paratyt.
Naprykancy chaču źviarnucca da baćkoŭ, jakija vahajucca paśla hučnych i trahičnych vypadkaŭ, źviazanych z vakcynacyjaj ŭ Biełarusi. Nie admaŭlajciesia ad vakcynacyi. Niama anivodnaj chvaroby, na jakuju lepiej było b pierachvareć, čym pryščapicca.
