Siamji z Łojeva, na dapamohu jakoj rabili składki biełarusy, addali 3-miesiačnaha Maksima
31 žniŭnia Alesi Faminych i Andreju Koŭziku z Łojeva viarnuli 3-miesiačnaha Maksima. Małoha ŭ prytułak zabrała dziaržava — praź biednaść baćkoŭ. Paśla artykuła na Svabodzie nieabyjakavyja arhanizacyi i biełarusy dapamahli siamji. Patrabavańni kamisii ŭ spravach niepaŭnaletnich — adramantavać chatu, pravieści vadu, zamianić hazavuju plitu, nazapasić droŭ — byli vykananyja, piša Radyjo Svaboda
«U čaćvier była kamisija. Usio pravieryli, skazali, što my małajcy — vykanali ŭsie patrabavańni. Abiacali addać Maksima. Jon byŭ u prytułku ŭ Homli. Učora, 31 žniŭnia, syna nam pryvieźli», — raspaviała Alesia Faminych.
Siamja vielmi ŭdziačnaja ŭsim biełarusam, jakija nie zastalisia abyjakavymi, maralna i materyjalna dapamahli im.
Nahadajem, 34-hadovaja Alesia Faminych naradziła pieršynca 10 traŭnia. Ciažarnaść była nialohkaj, žančyna šmat času pravodziła pa balnicach. Paśla naradžeńnia ŭ Maksima vyjavili parok serca, tamu małoha z maci pakinuli ŭ balnicy. Doma ŭ Łojevie jon da hetaha času nia byŭ. Spačatku — praz chvarobu, potym dzicia zabrali ŭ prytułak pa rašeńniu kamisii pa spravach niepaŭnaletnich Łojeŭskaha rajvykankamu.
Pryčynami adabrańnia Maksima čynoŭniki nazvali toje, što jaho baćka złoŭžyvaŭ alkaholem, u chacie — antysanitaryja, zapuščany aharod, minimalny zapas dziciačaj adzieńnia, posudu. Čynoŭniki prapisali ŭ rašeńni, što baćki «svaimi pavodzinami pazbaŭlajuć dzicia minimalnych sacyjalnych vyhod, nieabchodnych dla paŭnavartasnaha raźvićcia», u siamji «adsutničaje jaki-kolviek prybytak», niama vodapravodu.
Alesia Faminych tłumačyła Svabodzie, što da ciažarnaści pracavała prybiralščycaj, mieła zarobak 200 rubloŭ. Jaje sužyciel časova nie pracavaŭ. Jon traplaŭ u pole zroku milicyi praz złoŭžyvańnie alkaholem. Paśla naradžeńnia małoha Andrej prajšoŭ lekavańnie ad alkahalizmu, uładkavaŭsia na pracu.
Žycharka Łojeva pryznaje, što žyllovyja ŭmovy nie byli ŭ siamji najlepšyja, ale pryčyna hetamu — mizernyja zarobki, adsutnaść pracy ŭ rajcentry.
Maładuju siamju nieadnarazova naviedvali kamisii, jakija patrabavali vykanańnia šerahu ŭmoŭ. Paśla zaŭvah čynoŭnikaŭ Alesia z Andrejem zrabili nievialiki ramont, kupili novuju hazavuju plitu, pierarabili piečku i komin — zhodna z patrabavańniami pažarnych, narychtavali drovy.
Na praviadzieńnie vodapravodu hrošy pieraličyła dabračynnaja katalickaja misija «Karytas-Miłasernaść». Abiacaje akazać dapamohu i hramadzkaje abjadnańnie Rotary Club Minsk Sity. Jany ŭ najbližejšy čas naviedajuć siamju — pryviazuć nieabchodnyja rečy dla maci i dziciaci.
Nieabyjakavyja biełarusy pieraličyli siamji hrošy.
Pravaabaronca Leanid Sudalenka dapamoh Alesi Faminych skłaści skarhu staršyni Łojeŭskaha rajvykankama na dziejańni čynoŭnikaŭ.
