Hienadź Karatkievič z Homiela staŭ najlepšym na Google Code Jam u piaty raz zapar
Uradženiec Homiela Hienadź Karatkievič pieramoh na mižnarodnych spabornictvach pa prahramavańni Google Code Jam u Taronta. Jon staŭ pieršym piacirazovym čempijonam, piša Dev.by.
Google Code Jam pravodziać z 2003 hoda. Spabornictvy źjaŭlajucca adnym z samych masavych i prestyžnych čempijanataŭ pa prahramavańni ŭ śviecie.
U hetym hodzie kolkaść udzielnikaŭ pieravysiła 60 tysiač čałaviek. Pa ŭmovach spabornictva, kandydaty na pieramohu pavinny byli rašyć piać zadač za čatyry hadziny. Zadańni raźbityja na dźvie častki — «prostuju» i «składanuju». U hetym hodzie była i asablivaść: kali raniej prahramisty mahli vybirać AS, u jakoj buduć pracavać, to ŭ 2018-m na ŭsich spabornickich PK stajaŭ tolki Linux.
Biełarus nabraŭ 104 bały, jakich było dastatkova, kab atrymać hałoŭny pryz u 15 tysiač dalaraŭ.
Karatkievič płanuje praciahnuć navučańnie ŭ aśpirantury ŭ Sankt-Pieciarburhu. Bolš za toje, adzin z ustupnych ekzamienaŭ jon zdaŭ dystancyjna z Taronta.
23-hadovy Hienadź Karatkievič — adzin z samych tytułavanych spartyŭnych prahramistaŭ u śviecie. Akramia Google Code Jam, za jaho plačyma dźvie pieramohi na mižnarodnym čempijanacie pa prahramavańni ACM ICPC i piać pieramoh u «Jandeks.Ałharytmie».