Biznesmien Arkadź Izrailevič patrabuje ad «Novaha času» 40 tysiač rubloŭ
Jašče tysiaču rubloŭ jon choča atrymać ad Dzianisa Ivašyna. Takija patrabavańni vystaŭlenyja ŭ pazovie ab abaronie honaru, hodnaści i dziełavoj reputacyi, što padaŭ u sud Savieckaha rajona Minska spadar Izrailevič.
Pa mierkavańni Izraileviča, «redakcyjaj haziety «Novy čas» byli apublikavanyja šerah artykułaŭ, jakija istotna parušajuć takija niemateryjalnyja pravy, jak honar, hodnaść i dziełavaja reputacyja, jakija naležać mnie (Izraileviču) i achoŭvajucca zakonam».
Pa jahonym mierkavańni, artykuły aŭtara Dzianisa Ivašyna «pa svaim źmieście ŭ cełym i asobnyja vykazvańni aŭtara, u pryvatnaści, zmalajuć maje honar, hodnaść i dziełavuju reputacyju».
Jak kaža Izrailevič, sa źmiestu artykułaŭ jaŭna vynikaje, što mienavita jon i naležnaje jamu TAA «IV» źjaŭlajucca kancavym bienieficyjaram budaŭnictva restarana ŭ Kurapatach. Izrailevič adznačaje, što budaŭnictva restarana «Pajedziem, pajadzim» vyklikaje «supiarečlivyja» vodhuki siarod hramadstva. «U šerahu asobaŭ paśla pračytańnia artykułaŭ skłałasia ŭstojlivaje niehatyŭnaje staŭleńnie da mianie jak da biźniesmiena, zdolnaha zabudoŭvać miescy histaryčnaj pamiaci dzieła atrymańnia kamiercyjnaj vyhady», — piša Izrailevič.
Jon adznačaje, što paśla vychadu artykułaŭ na jaho staronki ŭ sacyjalnych sietkach «pačali pastupać skrajnie niepryjemnyja i navat źniavažlivyja kamientary».
Adnačasova Izrailevič nie chavaje, što asabista znajomy ź biźniesoŭcami — fihurantami rasśledavańnia Ivašyna, adnak «nie maju nijakich jurydyčnych adnosinaŭ da budaŭnictva restarana «Pajedziem, pajadzim» i tym kampanijam, jakija pieraličanyja ŭ artykule».
Izraiłajevič padkreślivaje, što ŭ jaho dobraja reputacyja ŭ biźniesie, a jaho kampanija isnuje 26 hadoŭ, i źviartajecca da pratakołu pasiadžeńnia navukova mietadyčnaj rady pa Kurapatach №115 ad 20.12.2005 hoda, siabram jakoha byŭ Alaksiej Martynaŭ. U hetym pratakole Martynaŭ byŭ paznačany, jak hałoŭny architektar «IV». «Na padstavie hetaha Dzianis Ivašyn vybudoŭvaje źviazany sa mnoju karupcyjny padtekst», — śćviardžaje Izrailevič i piša, što nasamreč Martynaŭ byŭ zvolnieny z «IV» jašče 21.01.2005.
«… Takim čynam, ja vymušany pastajanna apraŭdvacca i dakazvać svaju niedatyčnaść da budaŭnictva restarana, u cełym, i da pytańniaŭ pryniaćcia rašeńniaŭ pa hetym abjekcie, u tym liku šlacham uciahvańnia ŭ hety praces słužbovych asobaŭ u pryvatnaści», — piša biźniesoviec.
«Liču, što apublikavanyja artykuły prynižajuć moj honar, hodnaść i dziełavuju reputacyju ŭ hramadskim mierkavańni i mierkavańni asobnych hramadzian z punktu pohladu vykanańnia zakonaŭ i norm marali, u suviazi z čym ja adčuvaju pačućcio kryŭdy, niespraviadlivaści, a taksama pieražyvańnia z nahody vierahodnaści źnižeńnia hramadskaj acenki maich maralnych i dziełavych jakaściaŭ. Raspaŭsiudžanyja adkazčykami źviestki ŭjaŭlajuć mianie pierad inšymi asobami ŭ niehatyŭnym śviatle, z-za čaho ja adčuvaju mocnyja emacyjnyja pieražyvańni, pieryjadyčna horšaje i majo fizičnaje samaadčuvańnie».
Na padstavie hetaha spadar Izrailevič patrabuje abviaržeńnia źviestak, jakija, pa jaho mierkavańni, źnievažajuć jaho honar, hodnaść i dziełavuju reputacyju, i dumaje, što 40 tysiač rubloŭ ad «Novaha Času» i tysiača ad Ivašyna dapamohuć jamu pieražyć «pačućcio kryŭdy i niespraviadlivaści».
Papiaredniaje sudovaje pasiadžeńnie pryznačana na 29 žniŭnia.
