Na trasach Minsk — Ašmiany i Minsk — Hrodna masava rastaviać kamiery fotafiksacyi
Pieršy stacyjanarny datčyk fiksacyi chutkaści na trasie M6 budzie ŭstalavany ŭ žniŭni niedaloka ad Hrodna — kala pasiołka Bierahavy, dzie raniej byŭ post DAI. A dalej, pa miery zdačy ŭ ekspłuatacyju paśla rekanstrukcyi ŭčastkaŭ trasy na terytoryi Hrodzienskaj vobłaści, takija datčyki buduć ustaloŭvacca ŭ rajonach naziemnych piešachodnych pierachodaŭ. Jany ličacca avaryjna-niebiaśpiečnymi miescami, ale ŭsie taksama zastajucca na adnym uzroŭni z chutkasnaj aŭtamahistrallu.
Jak paviedamiŭ «Hrodzienskaj praŭdzie» načalnik abłasnoj Dziaržaŭtainśpiekcyi Uładzimir Nazarko, taksama razhladajecca dziesiać miescaŭ na mižnarodnaj aŭtamahistrali M7 dla ŭstanoŭki datčykaŭ fiksacyi chutkaści. Praciahłaść trasy M7 Minsk — Ašmiany — Kamienny Łoh (miaža Respubliki Litva) pa Smarhonskim i Ašmianskim rajonach bolš za 60 kiłamietraŭ, i tut taksama vielmi vysokaja intensiŭnaść ruchu.
Kiroŭcy ŭžo adčuli efiekt šumavych pałos, stvoranych na asabliva niebiaśpiečnym miescy M6. Zaraz pačynajecca ŭstanoŭka znakaŭ «Dzikija źviary» ŭ tych miescach, dzie žyvioły čaściej za ŭsio źjaŭlajucca na darohach. Usiaho na hetaj i inšych mahistralnych trasach budzie ŭstanoŭlena 48 znakaŭ, dla čaho vyznačana 15 učastkaŭ praciahłaściu 48 kiłamietraŭ.
Jak paviedamili ŭ RUP «Hrodnaaŭtadar», znaki «Dzikija źviary» zroblenyja pa najnoŭšych technałohijach. Na ich pavialičana śviatłodyjodnaje pakryćcio, naniesienaja śpiecyjalnaja plonka, tamu takija znaki ŭ ciomny čas sutak bačnyja zdalok. Kožny znak maje aŭtanomnaje siłkavańnie ad soniečnaj batarei.
Novyja znaki infarmujuć vadziciela ab tym, što, prajazdžajučy zonu ich dziejańnia, nieabchodna być vielmi ŭvažlivym, asabliva ŭ načny čas. Jak rastłumačyli ŭ abłasnym kamitecie pryrodnych resursaŭ i achovy navakolnaha asiarodździa, kiroŭca, jaki źbiŭ lasnych žyvioł u zonie dziejańnia takich śpiecyjalnych znakaŭ, budzie pakryvać košt naniesienaha ŭronu.
Na ŭsim praciahu abnoŭlenaj mahistrali ad Ščučynskaha rajona da miažy ź Minskaj vobłaściu budzie naniesienaja termapłastykavaja raźmietka. Harantyja jaje znosaŭstojlivaści — 36 miesiacaŭ, ale, jak praviła, termin słužby termapłastyku kudy bolšy.
