Biełarusy źniščyli samy bahaty kłub Rasii. Dynama — Zienit 4:0! VIDEA
Futbalisty minskaha «Dynama» siensacyjna vyjhrali ŭ picierskaha «Zienita» ź likam 4:0 ŭ pieršym matčy treciaha kvalifikacyjnaha raŭnda Lihi Jeŭropy.
Fota: Dźmitryj Bruško, Tut.by.
Haspadary pola sa startavych chvilin imknulisia kantralavać miač u sustrečy z samym bahatym kłubam Rasii. Lik na 12-j chvilinie adkryŭ Uraš Nikalič, jaki sa štrafnoha abvodnym udaram nakiravaŭ miač u levy nižni kut Juryja Ładyhina. U siaredzinie pieršaha tajma Uładzimir Chvaščynski padvoiŭ pieravahu ŭ liku dynamaŭcaŭ, svoječasova zhulaŭšy na dabivańni ŭ štrafnoj «Zienita». U kancy pieršaha tajma udaram hałavoj Nina Hałavič zrabiŭ lik 3:0.
U druhim tajmie minčanie vyhladali nie tak pierakanaŭča i hulali pieravažna ad abarony. Adnak na 67 chvilinie Uraš Nikalič skarystaŭsia adnym ź niešmatlikich šancaŭ dynamaŭcaŭ i zrabiŭ lik 4:0.
Druhi tajm akramia taho adznačyŭsia chulihanskimi pavodzinami zaŭziataraŭ haściej na trybunach: chtości sprabavaŭ vybiehčy na pole, a niechta padryvaŭ fajery.
Praz tydzień adbudziecca hulnia ŭ adkaz u Rasii. Kali «Dynama» zdoleje adstajać ahulnuju pieramohu, u nastupnaj stadyi daviadziecca hulać z šatłandskim «Chibiernianam» albo z narviežskim «Miolde». Pieramožca supraćstajańnia trapić u hrupavy raŭnd Lihi Jeŭropy.
