BT apublikavała telefonnuju razmovu Zołatavaj i Kałtyhinaj. Jana nijakim čynam nie dakazvaje čyjości «złačynstva»
Biełteleradyjokampanija prademanstravała ŭ efiry frahmient telefonnaj razmovy hałoŭnaha redaktara partała TUT.by Maryny Zołatavaj i vypuskajučaha redaktara Hanny Kałtyhinaj.
Śćviardžajecca, što aŭdyjazapis atrymany ad Śledčaha kamiteta, ale niezrazumieła, jakija byli jurydyčnyja padstavy dla prasłuški.
Zołatava kaža pra ideju: kab bujnyja rehijanalnyja partały — hrodzienski S13.ru (admietna, što redaktary BT nie viedajuć nazvu sajta, tamu pakinuli zamiest jaje zorački — NN») i homielskija «Mocnyja naviny» prasili dazvoł na pieradruk ekskluziŭnych artykułaŭ z TUT.by, a nie prosta kapijavali luby tekst.
Ale, maŭlaŭ, paŭstaje etyčnaje pytańnie, jakoje ahučyła [redaktar] Uljana [Babajed]: TUT.by ža «tyryć» naviny BiełTA. Tamu, vidać, niajomka zabaraniać inšym «tyryć» svaje materyjały.
U adkaz Hanna Kałtyhina raskazvaje, što vykarystoŭvaje dla pracy naviny z płatnaj stužki BiełTA, bo ŭ joj infarmacyja źjaŭlajecca troški raniej, čym u biaspłatnaj. «My jaje juzajem, my jaje tyrym», — kaža jana pra navinu, ale nie pra padpisku.
U žurnalisckim słenhu słovy nakštałt «pierastavić», «skapipaścić» (nacisnuć knopki «skapijavać»/copy i «ŭstavić»/paste) i navat «styryć» mohuć vykarystoŭvacca jak sinonimy i nie majuć kryminalnaha składniku. Bolšaść sajtaŭ dajuć adzin adnamu «tyryć» teksty, vitajučy raspaŭsiud infarmacyi pry ŭmovie karektnaha paznačeńnia pieršakrynicy. Umovy TUT.by dazvalali svabodnaje vykarystańnie infarmacyi lubym sajtam.
Adznačym, što ŭ razmovie ni razu nie zhadvajecca, ci byŭ u žurnalistaŭ TUT.by apłačany dostup da stužki BiełTA. Źlity siłavikami zapis nie daje adkazy na heta pytańnie.
