10 małaviadomych faktaŭ pra Alaksandra Kulinkoviča
U 46 hadoŭ pamior frontmen «Niejra dziubiela» Alaksandr Kulinkovič. Pryčynaj śmierci stała lohačnaja niedastatkovaść.
Kulinkovič sa svaimi pankaŭskimi pieśniami byŭ adnoj z najiarčejšych zorak roka 90-ch, pakaleńnia niezaležnaści.
A los hetaha čałavieka byŭ nie prosty.
Ledź nie pamior na apieracyjnym stale
U 1994 h. Alaksandru rabili surjoznuju apieracyju — u jaho znajšli puchlinu ŭ mazžačku. Usio pačałosia ź nievynosnych hałaŭnych bolaŭ, a paśla vyśvietliłasia, što treba terminova kłaścisia pad nož.
Minskija chirurhi na čale z prafiesaram Arnoldam Śmiejanovičam praviali hetuju składanuju apieracyju.
«Z taho času ŭ kancy listapada ja adznačaju druhi dzień naradžeńnia», — raskazvaŭ Kulinkovič.
Insult na scenie
Praz 20 hadoŭ paśla toj apieracyi Kulinkoviča napatkała novaja biada sa zdaroŭjem.
U krasaviku 2015 hoda naviedniki kancerta «Niejra Dziubiela» aburalisia pavodzinami vakalista — Kulinkovič błytaŭ i zabyvaŭ słovy, ledź chadziŭ pa scenie. Usie vyrašyli, što muzyka byŭ pjany, ale jak vyśvietliłasia paźniej, u Alaksandra zdaryŭsia mikrainsult. Pa słovach Alaksandra, pierad prezientacyjaj alboma jon nie spaŭ niekalki dzion i vielmi pieražyvaŭ z-za novaj kružełki hurtu, da taho ž trochi vypiŭ pierad vystupam.
Nazyvaŭ DNR bandytami
Kulinkovič pracavaŭ u dziaržaŭnaj haziecie «Sovietskaja Biełoruśsija», adnak nie saromieŭsia vykazvacca na vostryja temy. Naprykład, u adnym ź intervju jon rezka prajšoŭsia pa sieparatystach Danbasa:
«Lidary DNR i ŁNR — mnie zdajecca, što heta prosta bandyty, jakija dzielać kavałak ziamli. Jak u 90-ja hady bandyckija hrupoŭki dzialili śfiery ŭpłyvu, tak, mnie zdajecca, i ciapier hetyja ludzi dzielać śfiery ŭpłyvu. Tolki siońnia jany abraśli hierbami i himnami. Mnie zdajecca, jany elemientarnyja bandyty, i pastupać ź imi treba jak z bandytami».
Da hieorhijeŭskaj stužki muzyka staviŭsia «vielmi niehatyŭna»:
«Mnie kažuć, što heta znak, što hetaja stužka była na ordenach Słavy. Nu tak. Ale razumiejecie, svastycy, jakaja siońnia zabaroniena praktyčna va ŭsich krainach śvietu, šmat tysiač hadoŭ.
Tamu siońnia, kali baču hieorhijeŭskuju stužačku, u mianie staŭleńnie da jaje jak da niehatyŭnaha znaku. A da ludziej, jakija jaje vyviešvajuć, staŭleńnie jak da ludziej, jakija padtrymlivajuć adkryta fašysckuju ahresiju Rasii suprać Ukrainy».
Santechnik-žurnalist
Kulinkovič skončyŭ prafiesijna-techničnuju vučelniu, pa śpiecyjalnaści jon — santechnik. Paśla budučy muzyka jašče trochi pavučyŭsia na žurnalista ŭ BDU, ale «nie zrasłosia».
A zarablaŭ na žyćcio Kulinkovič nie muzykaj, a žurnalistykaj. Jon pisaŭ u roznyja vydańni, u tym liku i «Sovietskuju Biełoruśsiju», byŭ veb-redaktaram.
Jahonaja žonka Alena taksama pracavała ŭ miedyja.
Zajmaŭsia seksam u redakcyi haziety «Praŭda»
Pra niezvyčajny fakt raspaviadaŭ sam Kulinkovič u intervju «Kamsamołcy»:
«Ja zajmaŭsia kachańniem u redakcyi haziety «Praŭda», kali mianie pakinuli tam načavać, zahadaŭšy ničoha nie čapać».
«Zabić asiecina»
Viadomaja nazva «Niejra Dziubiel» źjaviłasia ŭ kalektyva nie adrazu. Pieršaj idejaj było nazvać hurt «Muzyčnaje abjadnańnie «Zabić asiecina». Pryčym, ideja naležała jakraz Alaksandru Kulinkoviču. Praŭda, jaho ŭsio ž adhavaryli ad takoj nazvy.
Śpiavaŭ z Ksiušaj Sitnik
U 2010 hodzie Kulinkovič niečakana zaśpiavaŭ razam ź pieramožcaj dziciačaha «Jeŭrabačańnia» Ksienijaj Sitnik. Razam jany vykanali pieśniu «My vmiestie», ź jakoj Ksienija pieramahła ŭ konkursie ŭ 2005 h.
Vystup adbyŭsia na hała-kancercie adboračnaha konkursu na dziciačaje «Jeŭrabačańnie», jaho pakazvali pa BT.
Kraina mary — Narviehija
U šmatlikich intervju Kulinkovič nieadnarazova kazaŭ, što nienavidzić Minsk, i, kab nie praca, daŭno źjechaŭ by ŭ viosku. Dy i ŭvohule, muzyka adznačaŭ, što ŭ biełaruskim žyćci nadta šmat niedarečnaściaŭ.
A idealnaj krainaj Alaksandr ličyć Narviehiju. U jaho doma navat visieŭ narviežski ściah na ścianie.
Zaŭzieŭ za «Čykaha Bułz»
Kulinkovič pryznavaŭsia, što nie nadta cikavicca sportam — ź biełaruskich kamandaŭ uvohule viedaŭ tolki BATE i staličnaje «Dynama». U apošnim kłubie, darečy, u jaho hulaŭ brat.
Ale peŭnyja simpatyi Kulinkovič usio ž mieŭ. Jon pryznavaŭsia, što «tapiŭ» za viadomy baskietbolny kłub «Čykaha Bułz», navat hladzieŭ usie hulni čempijanatu NBA z udziełam hetaj kamandy. A na čempijanacie śviecie pa futbole (u 2010 hodzie) ŭ finale padtrymlivaŭ hałandcaŭ i byŭ vielmi rasčaravany hulnioj, bo vyjhrała Ispanija.
Pačaŭ pisać pieśni na biełaruskaj dziakujučy Karatkieviču
«Byŭ supolnik na vieršy Karatkieviča, pieśnia «Skrypka dryhvy». Choć albom nie vyjšaŭ, ale trybjut mieŭ svoj plon, bo dziakujučy jamu ja pačaŭ śpiavać pa-biełarusku, — raskazvaŭ Kulinkovič. — U pieśni ž jak? Abo ty śpiavaješ na movie, na jakoj dumaješ, abo pieśni vyjduć miortvyja.
Dyk choć ja rasijskamoŭny, ale nastolki prasiaknuŭsia paezijaj Karatkieviča, što paprasiŭ u Volskaha jašče kolki biełaruskich knih pačytać. I tak zachapiŭsia, što kali-nikali pačaŭ dumać pa-biełarusku. I palacieła, nie spynić-nie strymać: pačaŭ składać i hulacca słovami…»
* * *
Kulinkovič sa svaimi pankaŭskimi pieśniami byŭ adnoj z najiarčejšych zorak roka 90-ch.
Jon padtrymlivaŭ nacyjanalna-demakratyčnuju apazicyju, za heta trapiŭ u stvoranyja ideołahami čornyja śpisy. Jamu zabaraniali vystupać, urešcie jon vymušany byŭ pajści kałumnistam u «Sovietskuju Biełoruśsiju».
Da apošniaha jon bajaŭsia znoŭ akazacca zabaronienym dla sceny.
Uviesnu 2018-ha jon admoviŭsia śpiavać na Dni Voli i vielmi niervova adreahavaŭ na chvalu krytyki, što abrynułasia na jaho za heta navat z boku siabroŭ i byłych prychilnikaŭ.
Heta byŭ sapraŭdny tvorca.
«Voś tak i skanaŭ miž azioraŭ i rek
Tutejšy, ale ŭžo marski čałaviek.
Lažyć u svajoj biełaruskaj ziamli
U draŭlanym apošnim svaim karabli…»
«Naša Niva» dałučaje svaje spačuvańni Sašavaj siamji i ŭsioj biełaruskaj rok-supolnaści.
Čytajcie taksama: Kulinkovič pra kancert la Opiernaha: Vam rabić nie**j, vy nie kachajecie, siabrujecie tolki z rukoj — adny zahavory «Žyvie Biełaruś!»
Kulinkovič: Kali ty zabaronieny, ty nie raźvivaješsia
Kulinkovič paprasiŭ prabačeńnia ŭ hledačoŭ za kancert, na jakim jon byŭ pjany ŭ dym
