Raście papulacyja łasioŭ i aleniaŭ, a voś rysiaŭ i miadźviedziaŭ — mienieje
Nacyjanalny statystyčny kamitet apublikavaŭ apublikavaŭ dadzienyja pa kolkaści roznych žyvioł u Biełarusi pa stanie na 2018 hod. Pryčym zroblena heta ŭ paraŭnańni ź ličbami 2011 i 2016 hadoŭ.
Fota gtfohota.by.
Kali paraŭnoŭvać ź minułym hodam, to mieniej stała sysunoŭ, jakija zaniesienyja ŭ Čyrvonuju knihu. Asabliva imkliva źnikaje norka jeŭrapiejskaja. Jašče try hady tamu ŭ Biełarusi naličvałasia 351 asobina hetaj žyviolinki. Na siońnia ž ličba skaraciłasia až da 101.
Jeŭrapiejskuju norku vyciskaje ź Biełarusi norka amierykanskaja, jakaja dobra pryžyłasia ŭ hetych miaścinach. Na amierykanskuju norku možna navat palavać. Na siońnia ŭ krainie naličvajecca 24 tysiačy takich žyviolinak. I hety puchnaty źviarok stabilna razmažajecca.
Na žal, pamienieła miadźviedziaŭ. Letaś u lasach krainy ich naličvałasia 76 asobinaŭ, ciapier ža tolki 68. U paraŭnańni z 2014 hodam u paŭtara raza źmienšyłasia kolkaść rysiaŭ: z 771 da 489.
Jašče bolš katastrafičnaja situacyja z barsukami. Za hetyja try hady ich kolkaść źmienšyłasia 1416 da 681. Barsukoŭ aktyŭna vyciaśniajuć ź biełaruskich lasoŭ janoty.
Zatoje raduje, jak pavialičvajecca kolkaść vysakarodnych aleniaŭ. Jašče ŭ 2011 ich naličvałasia 10 tysiač, ciapier ža kolkaść vyrasła da 21 tysiačy. Pazityŭnaja tendencyja i z łasiami: z 24 tysiač da 36.
Papulacyja dzikoŭ u Biełarusi była amal całkam źniščanaja padčas epidemii afrykanskaj čumy śviniej. Adnak ciapier kryšačku pačynaje raści. Letaś naličvałasia 2,6 tysiač asobin, ciapier užo 2,8 tysiač. U pikavyja hady kolkaści dzikoŭ dasiahała zvyš 70 tysiač.
Źviartaje ŭvahu, što niečakana źmienšyłasia kolkaść lisic. U 2011 hodzie ich naličvałasia 42 tysiačy. Na siońnia zastałosia 25. Niaznačna za hety samy pieryjad skaraciłasia kolkaść babroŭ: z 60 da 51 tysiačy.
Zatoje faktyčna nijak nie źmianiłasia kolkaść zajcoŭ. Šeść hadoŭ tamu ich było 169 tysiač, na siońnia 167.