Pryncyp Ihara Bajcova: choć raz na dzień pahavaryć pa-biełarusku z ruskamoŭnym surazmoŭcam
Pajšoŭ z žyćcia vydatny architektar i abaronca histaryčnaj spadčyny.
19 lipienia paśla ciažkaj biaźlitasnaj chvaroby nazaŭsiody adyšoŭ ad nas siabra Biełaruskaha sajuza architektaraŭ, znany, vydatny architektar Ihar Mikałajevič Bajcoŭ. Jamu było 82 hady.
Naradziŭsia Ihar Mikałajevič 20 sakavika 1936 ŭ Jarasłaŭli, u siam‘i fizikaŭ. Ale ŭsio jaho žyćcio było źviazanaje ź Biełaruśsiu. Tut jon vučyŭsia ŭ Biełaruskim politechničnym instytucie (skončyŭ jaho ŭ 1959 pa śpiecyjalnaści «architektura»). Jaho lubimymi vykładčykami byli Ju. Jahoraŭ, N. Špihielman, V. Husieŭ i N. Maklacova, jakaja, darečy, sprajektavała budynak, u jakim jon pražyŭ amal usio žyćcio.
Ihar Mikałajevič paŭstahodździa pracavaŭ u biełaruskich prajektnych instytutach, stvoranyja im budynki, abjekty, cełyja kvartały ciažka źličyć.
Rekanstrukcyja žyłoha doma ŭ Niaśvižy. Aŭtar Ihar Bajcoŭ. Hrafika Alena Zinoŭjeva.
Chlebazavod ŭ Talinie. Aŭtar i hrafika Ihar Bajcoŭ.
Minski abłasny krajaznaŭčy muziej u Maładziečnie.
Krajaznaŭčy muziej u Niaśvižy. Aŭtar Ihar Bajcoŭ.
Rekanstrukcyja žyłoha doma ŭ Baranavičach. Aŭtar i hrafika Ihar Bajcoŭ.
Łaźnia ŭ Stoŭbcach. Aŭtar i hrafika Ihar Bajcoŭ.
Prajekty, jakimi prailustravany hety artykuł, — mizernaja častka zroblenaha spadarom Iharam dziela ŭpryhažeńnia biełaruskich (i nie tolki) haradoŭ.
Ihar Bajcoŭ apiekavaŭsia i architekturnaj spadčynaj minułych časoŭ. Jon byŭ navukovym kiraŭnikom šerahu abjektaŭ nieruchomaj materyjalnaj historyka-kulturnaj kaštoŭnaści. U tym liku budynku kalehiuma jezuitaŭ, klaštara franciškancaŭ u Pinsku, i šerahu inšych histaryčnych budynkaŭ.
Ihar Mikałajevič byŭ talenavitym majstram architektury, zaŭsiody ŭličvaŭ histaryčnuju, mastackuju značnaść isnujučaj zabudovy ŭ svaich prajektach. Jon pieradavaŭ svaim kaleham uźniosłaje staŭleńnie da dojlidstva, dapamahaŭ stanaŭleńniu ich majsterstva.
Navahradski zamak. Ihar Bajcoŭ. Zamaloŭka.
Ihar Bajcoŭ. Płakat.
Ihar Mikałajevič byŭ admietny encykłapiedyčnymi viedami ŭ śfiery kultury, litaratury, mastactva, architektury.
Byŭ aŭtaram šmatlikich ese i artykułaŭ u hazietach «Naša Niva», «Kultura», časopisach «Architektura i budaŭnictva Biełarusi», «Mansardavaje budaŭnictva». Jaho hruntoŭnyja, admysłovyja artykuły dapamohuć adkazna stavicca da najistotniejšych architekturnych prablemaŭ Biełarusi i da zachavańnia historyka-kulturnaj spadčyny.
Ihar Bajcoŭ. Zamaloŭka.
Z padtrymkaj, vieraj i nadziejaj staviŭsia jon da idei biełaruskaha adradžeńnia. Jon ličyŭ, što treba choć raz na dzień pahavaryć pa-biełarusku z ruskamoŭnym surazmoŭcam.
Ihar Mikałajevič byŭ žanaty, mieŭ dačku i troch unukaŭ, žonka Inesa i dačka Kaciaryna taksama architektary.
Spadar Ihar zrabiŭ mnoha dobraha dla rodnych, siabroŭ dziela Biełarusi. My zaŭsiody budziem uspaminać ź ciepłynioj u dušy jaho advahu i mužnaść, ź jakoj jon ustojliva i niepachisna zmahaŭsia da apošniaha dnia za toje, kab nie psavali architekturu i panaramu rodnaj stalicy, histaryčnyja tradycyi zabudovy jaje centra, unikalny pryrodny łandšaft.
