Vyjšła dziciačaja kniha pra kata, jaki vandruje pa Minsku
U vydaviectvie «Januškievič» pabačyła śviet kniha Hanny Jankuty «Kot Šprot i tajamnica atrakcyjonaŭ» ź ilustracyjami Lilii Davydoŭskaj.
Heta pieršaja aŭtarskaja kniha ŭžo viadomaj šyrokaj biełaruskaj supolnaści pierakładčycy z anhlijskaj i polskaj moŭ. Jaje asablivaść u tym, što dziejańnie knihi adbyvajecca ŭ sapraŭdnych minskich miaścinach: zavułak Kalinina, bulvar Tałbuchina, park Čaluskincaŭ… Čytačy mohuć ździejśnić padarožža pa realnym horadzie. Darečy, i ŭ kata Šprota jość realny pratatyp.
Pa siužecie kot Šprot, jaki lubić unačy ciškom źbiehčy z bałkona i pabłukać pa vakolicach, znajomicca z pryvidami, što žyvuć pad voknami jaho doma. Tak pačynajucca pryhody kata i chłopčyka Alesia ŭ minskim Parku Čaluskincaŭ, zaviazvajecca ich siabroŭstva z susiedziami — pryvidami, vierabjami i myšami. Hieroi knihi ratujuć siabroŭ, jakija trapili ŭ zahadkavuju pastku, i vučacca razam spraŭlacca ź niahodami.
Ilustracyi ŭ knizie žyvuć asobnym žyćciom: kali ich uvažliva razhledzieć, to možna ŭbačyć, što piersanažaŭ troški bolš, čym u tekście, i ŭ hetych zahadkavych piersanažaŭ taksama jość svaja cikavaja historyja. Usiaho ŭ knizie amal 50 malunkaŭ. Kali vy nie ź Minska ci nikoli nie byvali tut, dla lepšaj aryjentacyi mastačka namalavała kartu.
Hanna Jankuta — pierakładčyca knih dla dziaciej i darosłych. Dziakujučy joj pa-biełarusku źjavilisia na śviet historyi pra Šerłaka Chołmsa, zimovaja kazka z pryvidami «Kaladny charał» Dykiensa, kniha žachaŭ «Zamak Otranta» Uołpała i šmat čaho jašče. Chobi aŭtarki — nazirańnie za ptuškami i haradskim žyćciom. Z katom Šprotam znajomaja asabista.
Lilija Davydoŭskaja — ilustratarka i dyzajnierka, vypusknica Akademii mastactvaŭ. Žyvie i pracuje ŭ Kairy (Jehipiet). Zamaloŭki z roznych haradoŭ i krain možna pahladzieć u jaje akaŭncie Instagram, a zamaloŭki z zavułka Kalinina i Parku Čaluskincaŭ — u knizie pra kata Šprota.
«Kot Šprot i tajamnica atrakcyjonaŭ» — tolki pieršaja kniha ź sieryi pra niezvyčajnaha kata i jaho siabroŭ. Čytačoŭ čakaje praciah — kab sabrać usiu kalekcyju, varta pačynać užo ciapier!
Knihu možna nabyć u internet-kniharni Januskevic.by, a nieŭzabavie jana źjavicca ŭ viadučych kniharniach Minska i ŭsioj krainy.
