Žančyna-miechanizatar, jakaja atrymała traktar na «Dažynkach», zvolniłasia i šukaje pracu
Miechanizatar Halina Kažanava, jakoj uručyli na «Dažynkach» traktar, płanuje pieravučycca na śpiecyjalista pa achovie pracy.
- Jašče miesiac tamu zvolniłasia. Takoje staŭleńnie ja nie mahu vynosić. Napisała zajavu, - raspaviała žančyna tut.by.
Nahadajem, u kancy maja ŭ KSUP «Kryŭsk» Buda-Kašaloŭskaha rajona vybuchnuŭ skandał: dyrektar haspadarki zvolniŭ adnaho z najlepšych miechanizataraŭ Halinu Kažanavu i zabraŭ u žančyny mienavita toj traktar, jaki joj uručyli na «Dažynkach» u Žytkavičach. Razam z Halinaj zvolnili i jaje muža Siarhieja.
Pa słovach žančyny, situacyja vyhladała tak: im treba było aformić dakumienty na dom, dla hetaha nieabchodna było źjeździć u Homiel da nataryusa. Ranicaj pierad aŭtobusam Halina z mužam zajšli ŭ dyśpietčarskuju haspadarki i tam pakinuli zajavu na adhuł (kažuć, tak robiać zaŭsiody) - i źjechali. Na nastupny dzień pryjšli na pracu, ale da jaje ich nie dapuścili. «U vas prahuł, nam takija rabotniki nie patrebnyja», - adkazali im u kantory.
Halina nie pavieryła svaim vušam. U hetaj haspadarcy jana z mužam pracuje ŭžo try hady, i za hety čas - nivodnaj skarhi. Naadvarot: žančyna była na dobrym rachunku, pieradavik pracy.
Za 18 hadoŭ stažu Halinu Mikałajeŭnu nie raz ŭšanoŭvali za dobrasumlennuju pracu. A ŭ minułym hodzie adpravili ŭ składzie Buda-Kašaloŭskaj delehacyi na abłasnyja «Dažynki», dzie ŭručyli novieńki «Biełarus». Na im žančyna i pracavała da zvalnieńnia.
Ab zvolnienych miechanizatarach napisali ŚMI, u kanflikt ŭmiašałasia kiraŭnictva z vobłaści. Raźbiracca ŭ situacyi ŭ Kryŭsk pryjazdžaŭ namieśnik hubiernatara pa sielskaj haspadarcy i charčavańniu Alaksandr Mikałucki.
«Mikałucki ich papiaredziŭ: Halu nie kryŭdzić, navat joj telefon svoj daŭ, skazaŭ, buduć kryŭdzić - adrazu telefanuj», - raspaviadaŭ tady tut.by muž Haliny.
- Nu i čamu nie patelefanavali? - pytajem jaje siońnia.
- Nie zachacieła turbavać. U jaho i bieź mianie kłopataŭ šmat, - uzdychaje Halina.
Ciapier jana šukaje pracu. U Homieli ŭ Centra zaniataści nasielnictva joj prapanavali prajści navučańnie pa śpiecyjalnaści «Achova pracy». Žančynu hety varyjant zacikaviŭ. Źviazacca z kiraŭnictvam haspadarki tut.by nie ŭdałosia.