Pačaŭsia praces Fiadyniča i Komlika: im pahražaje turma za zbor hrošaj za miažoj na patreby prafsajuza
30 lipienia pačaŭsia praces pa spravie staršyni niezaležnaha prafsajuzu rabočych radyjoelektronnaj pramysłovaści (REP) Hienadzia Fiadyniča i buchhałtara REP Ihara Komlika. Im pahražaje da siami hadoŭ pazbaŭleńnia voli.
Hienadź Fiadynič (sprava) i Ihar Komlik pryjšli na praces u vyšyvankach.
Padtrymać Fiadyniča i Komlika pryjšło pad sotniu ludziej. Siarod ich palityki Anatol Labiedźka, Vital Rymašeŭski, aktyvist Leanid Kułakoŭ, pravaabaronca Valancin Stefanovič… Pryjšoŭ navat Stanisłaŭ Šuškievič. U zału trapiła 65 čałaviek čałaviek.
Hienadź Fiadynič paviedamiŭ sudździ, što jašče zahadzia prasiŭ arhanizavać praces u bolšym pamiaškańni, ale heta praihnaravali. Ciapier jon padaŭ chadajnictva, kab pasiadžeńnie pieranieśli ŭ inšuju zału, ale sudździa Fiodarava adchiliła jaho.
Cikava, što na ŭvachodzie ŭ zału pastavili mietałašukalniki, a ludziej abšukvali milicyjanty — nadzvyčajnyja miery biaśpieki, jakija ŭžyvajucca tolki na samych rezanasnych spravach.
Pierad pracesam Ihar Komlik paviedamiŭ, što spadziajecca na pazityŭny vynik: «Čakaju, što vyjdziem adsiul narmalna».
Taksama jon paviedamiŭ, što padaŭ u sud za paklop na resurs Biełnovosti: «Bo raspaŭsiudžvajuć niejkuju łuchtu. Nibyta ja kraŭ hrošy, nabyvaŭ za ich niejkija kvatery…»
Ihar Komlik.
Ihar Komlik paviedamiŭ sudździ na pačatku pracesa: «Ja sudovaj sistemie nie daviaraju, bo ŭ nas daŭno niama pravavoj dziaržavy. Ale ž kali ja zajaŭlu vam advod, vas zamieniać inšym vincikam. Tamu chadajnictvaŭ nie maju».
Zatym prakuror začytaŭ abvinavačvańnie.
Pa viersii śledstva, Fiadynič i Komlik adkryli rachunak prafsajuza REP u litoŭskim banku u 2011 hodzie. Tudy im pieraviali srodki zamiežnyja donary, Komlik źniaŭ hrošy, z dapamohaj inšych pieravioz u Biełaruś.
«Fiadynič i Komlik dziejničali jak hrupa asobaŭ pa papiaredniaj zmovie: nie zarehistravali srodki jak hrašovuju dapamohu ad zamiežnikaŭ, takim čynam atrymali prybytak u 17 tysiač dalaraŭ», — začytaŭ prakuror. Paźniej u tym ža hodzie takim ža čynam abvinavačanyja, pavodle viersii śledstva, abyšlisia sa 140 tysiačami jeŭra.
«Nie razumieju, jak ja moh adkryć rachunak u Litvie, kali 15 miesiacaŭ u toj pieryjad nie vyjazdžaŭ ź Biełarusi?» — padziviŭsia Hienadź Fiadynič. Vinu jon nie pryznaŭ.
Ihar Komlik nazvaŭ abvinavačvańnie vydumanym. Nie pryznaŭ vinu i jon.
Sudździa vyrašyła abvieścić pierapynak da 14:30, a paśla vysłuchać pakazańni śviedkaŭ.
U 2011 hodzie pa spravie z anałahičnymi abvinavačańniami byŭ asudžany Aleś Bialacki. Jon atrymaŭ 4,5 hoda źniavoleńnia. Pravaabaroncy Biełarusi i śvietu adnahałosna pryznali Bialackaha palitviaźniem.
Nahadajem, sprava pačałasia hod tamu. U žniŭni 2017 hoda ŭ ofisach REP i ŭ kvaterach staršyni i buchhałtara prajšli pieratrusy. Zatrymali Hienadzia Fiadyniča, ale paśla adpuścili. Buchhałtar Ihar Komlik pravioŭ pad vartaj amal 2 miesiacy. Ciapier jany na voli, ale pad padpiskaj.
Darečy, 31 lipienia Fiadyniču spaŭniajecca 61 hod.