Brytanski prafiesar naviedaŭ Minsk: «Heta ŭnikalna!»
Prafiesar ekanomiki z Łondanu stvaryŭ mini-hid pa biełaruskaj stalicy.
Prafiesar ekanomiki ŭ mižnarodnaj biznes-škole ESCP Europe Entani Džej Evans byŭ nastolki ŭražany pobytam u biełaruskaj stalicy, što stvaryŭ na svaim sajcie nievialiki hid pa Minsku.
«Ja naviedaŭ Minsk u čakańni pabačyć savieckuju mašynu času, — piša jon. — Ja dumaŭ, jon budzie padobny da Maskvy, jakoj jana była ŭ 1992 hodzie. Ale ja pamylaŭsia!»
Prafiesar, jak i mnohija inšyja zachodnija vandroŭniki da jaho, zaŭvažaje, što horad byŭ całkam razburany ŭ minułuju vajnu i pabudavany nanoŭ. Jon paŭsiudna naziraŭ ludziej u vajskovaj uniformie, byŭ ździŭleny traktarami na haradskich vulicach i «biezdakornaj achajnaściu» vopratki staličnych školnikaŭ.
Adsutnaść demakratyčnaj pierajemnaści ŭłady kidaje na horad «intryhoŭny cień», pryznajecca Entani Džej Evans.
«Ale horad vielmi žyvy, zamožny, i biezzahanna čysty», — piša prafiesar. Vandroŭka ŭ Minsk nahadała jamu, chutčej, karotkija vakacyi ŭ prybałtyjskim horadzie, a nie «stereatypnuju ŭschodniejeŭrapiejskuju hłuchmień». Jon adznačyŭ dobra zładžanauju sietku pryharadnaj čyhunki i pryhažość staličnych vakolicaŭ.
U svaim mini-hidzie prafiesar pryvodzić śpis karysnych paradaŭ dla vandroŭnikaŭ. Nabor dosyć zvykły — pryvakzalnyja damy «brama Minsku», Trajeckaje pradmieście, HUM. Taksama jon raić naviedać «stylovyja bistro» na vulicy Karła Marksa, zavitać na Zybickuju ź jaje barami dy Kastryčnickuju ź jaje murałami dy «chipstarskaj kavaj». A voś infarmacyju pra «biaźviz» na tryccać dzion aŭtar dadać jašče nie paśpieŭ.
«Ja mocna rekamienduju vizit u Biełaruś», — piša prafiesar.
«Minsk prapanuje intryhoŭnuju sumieś standartnaj jeŭrapiejskaj atmaśfiery z zachaplalnym histaryčnym kantekstam. Biełaruś nie zusim Polšča i nie zusim Rasija, jana niešta inšaje. Niešta hruntoŭnaje i stałaje. Ale toje, što hladzić u budučyniu z aptymizmam. Heta sapraŭdy ŭnikalna», — padsumoŭvaje jon.
