Nikoł Pašynian: Prodaž Azierbajdžanu biełaruskich «Pałanezaŭ» nieprymalny
Prodaž Biełaruśsiu Azierbajdžanu svaich sistem załpavaha ahniu «Pałanez» abvastryŭ adnosiny pamiž Minskam i Jerevanam. Pra heta ŭ intervju Jeŭraradyjo zajaviŭ premjer-ministr Armienii Nikoł Pašynian.
Jakimi vy bačycie ŭ dalejšym ŭzajemaadnosiny pamiž Armienijaj i Biełaruśsiu?
Pašynian: U nas dobryja adnosiny, ale ja dumaju, što ŭ nas jość vialiki patencyjał i my pavinny jaho realizavać. Kaniešnie, u nas jość zakłapočanaść z nahody prodažu Biełaruśsiu zbroi Azierbajdžanu. I heta vialikaja prablema dla našych adnosinaŭ. Ja pra heta havaryŭ z prezidentam Łukašenkam. I vy viedajecie, hetaja prablema abvastrajecca tym, što Armienija i Biełaruś źjaŭlajucca vajenna-palityčnymi partniorami ŭ miežach ADKB. Usie hramadzianie Armienii niezadavolenyja z nahody taho, što Biełaruś pradaje zbroju Azierbajdžanu.
Viedaju, što i vy, i inšyja čynoŭniki Armienii sprabujuć uhavaryć Minsk i asabista Łukašenku bolš Azierbajdžanu zbroju nie pradavać. Jak dumajecie, atrymajecca?
Pašynian: Dumaju, niapravilna kazać, što my sprabujem uhavaryć. My tłumačym našu pazicyju pa hetym pytańni. My z pavahaj stavimsia da intaresaŭ Biełarusi i spadziajemsia, što Biełaruś z pavahaj stavicca da intaresaŭ Armienii. Na žal, dla nas takaja dziejnaść (prodaž Biełaruśsiu zbroi Azierbajdžanu. — Jeŭraradyjo.) nieprymalnaja, i ja chaču pra heta skazać naŭprost.
Nahadajem, pra toje, što Biełaruś pradała Azierbajdžanu sistemy załpavaha ahniu «Pałanez», stała viadoma ŭ červieni, kali prezident Ilcham Alijeŭ braŭ udzieł u adkryćci vajskovaj čaści rakietnych vojskaŭ Azierbajdžana. Na fota ź mierapryjemstva trapili i biełaruskija «Pałanezy». U toj ža dzień namieśnik ministra zamiežnych spraŭ Armienii Ruben Rubinian zajaviŭ: «Škada, što Biełaruś, siabroŭskaja nam kraina, pradaje ŭzbrajeńnie krainie, jakaja maje z nami kanflikt».
Pa słovach staršyni Savieta nacyjanalnaj biaśpieki Armienii Armena Hryharana, ciapier i MZS, i Saviet nacbiaśpieki Armienii pracujuć nad tym, kab Biełaruś admoviłasia ad prodažu ŭzbrajeńnia Azierbajdžanu.