Baćki baranavickich pieršakłaśnikaŭ, jakija žadajuć navučać dziaciej pa-biełarusku, dasłali elektronny list u Ministerstva adukacyi
Užo dva hady žychary Baranavič sprabujuć dabicca stvareńnia biełaruskamoŭnaha kłasa ŭ himnazii №4, što znachodzicca ŭ centry horada. Ułady adpraŭlajuć ich vučycca ŭ adzin ź mikrarajonaŭ — SŠ №16.
Svoj elektronny zvarot dziesiać baćkoŭ 16 lipienia nakiravali ŭ ministerstva, praz paru dzion jany pa pošcie dašluć ŭ ministerstva zvarot z podpisami, a kopiju — u vykankam. Ci adkryjecca biełaruskamoŭny kłas u himnazii №4, dahetul nieviadoma.
«Niaŭžo dla 10 maleńkich biełarusikaŭ, baćki jakich advažylisia zajavić pra svoj nacyjanalny honar i hodnaść, u rajonnym centry znoŭ nie mohuć znajści miesca?! <…>Składvajecca ŭražańnie śviadomaha źniščeńnia biełaruskamoŭnaj adukacyi, što źjaŭlajecca prykmietaj etnacydu biełarusaŭ, jaki, pa mierkavańni navukoŭcaŭ, źjaŭlajecca adnoj z formaŭ hienacydu, zasnavanaj na infarmacyjnych technałohijach. <…>Nastojvajem na vykanańni našych zakonnych patrabavańniaŭ i źviartajemsia da Vas z prośbaj zabiaśpiečyć navučańnie našych dziaciej na dziaržaŭnaj biełaruskaj movie ŭ himnazii №4 h. Baranavičy», — źviartajucca jany da Ministerstva adukacyi.
Čarhovy baćkoŭski schod po hetym pytańni adbyŭsia 12 lipienia. Na im akramia baćkoŭ prysutničali staršynia Tavarystva biełaruskaj movy imia Francyska Skaryny, deputat Pałaty pradstaŭnikoŭ Nacyjanalnaha schodu Respubliki Biełaruś Alena Anisim, siabry Baranavickaha adździaleńnia Tavarystva biełaruskaj movy, vykonvajučaja abaviazki kiraŭnika adździeła adukacyi Viera Vajciachoŭskaja, dyrektar himnazii №4 Vadzim Ščarbakoŭ i dyrektar siaredniaj škoły №16 Viačasłaŭ Dziaŭho.
Alena Anisim padtrymała baćkoŭ i vykazała dumku, što ŭ budučyni himnazija mahła b stać całkam biełaruskamoŭnaj.
Znajści niejkaje parazumieńnie na schodzie pamiž bakami nie atrymałasia.
