Jak padać zajavu ŭ ZAHS?
Za jaki čas, kudy i jakija dakumienty spatrebiacca? Na što źviarnuć uvahu pry padačy zajavy ŭ ZAHS.
U jaki ZAHS padavać zajavu na šlub?
Kali raniej zarehistravać šlub možna było tolki pa miescy rehistracyi adnaho z maładych abo pa miescy prapiski baćkoŭ, to siońnia takaja ŭmova ŭžo nie abaviazkovaja: vas mohuć raśpisać u lubym ZAHSie krainy. Hałoŭnaje — najaŭnaść volnaj daty i času.
Za jaki čas da viasiella treba padać zajavu?
Pa zakonie minimalny termin z momantu padačy zajavy da rehistracyi šlubu — try dni (zrazumieła, pry najaŭnaści volnaha dla rehistracyi času). U niekatorych vypadkach hety pieryjad možna źmienšyć navat da adnaho dnia: naprykład, praź ciažarnaść, najaŭnaść ahulnaha dziciaci ci pa inšych abstavinach, jakija mohuć trapić pad katehoryju «asablivy vypadak». Kab paskoryć zaklučeńnie šlubu, buduć patrebnyja adpaviednaja zajava i dakumienty, jakija źjaŭlajucca padstavaj dla skaračeńnia (paviestka z vajenkamata, daviedka ab ciažarnaści i inšaje).
Što datyčyć maksimalnaha terminu, to vam treba asabista padać dakumienty i zajavu za try miesiacy da abranaj daty. Dla tych, chto žadaje padać zajavu zahadzia (navat za paŭhoda), isnuje varyjant papiaredniaj elektronnaj rehistracyi na sajcie ZAHSa, dzie ŭkazvajucca dzień i čas rehistracyi, a taksama asabistaja infarmacyja. Ale dajści da ZAHSa vam usio ž pryjdziecca. Paśla afarmleńnia anłajn-zajaŭki vy atrymajecie adkaz z adnoj ci dźviuma datami, kali vam treba padyści ŭ adździeł ZAHSa dla padačy zajavy ŭ rukapisnaj formie.
Pierad padačaj zajavy źviarnicie asablivuju ŭvahu na datu i čas rośpisu. Lepš padrychtavać niekalki varyjantaŭ, kab paźbiehnuć roznaha kštałtu fors-mažoraŭ.
Jakija dakumienty spatrebiacca?
Dla taho, kab aformić zajavu na šlub u Biełarusi, nie treba dastavać usie dakumienty z šafy ci biehać pa jurydyčna zavieranyja kopii. Spatrebiacca tolki nastupnyja:
- pašparty žanicha i niaviesty;
- kvitok ab apłacie dziaržpošliny (mohuć vydać i ŭ ZAHSie);
- sumiesnaja zajava ab rehistracyi šlubu (zapaŭniajecca na miescy).
U nieardynarnych situacyjach mohuć spatrebicca paśviedčańnie pra skasavańnie papiaredniaha šlubu, dakumient ab źmienie proźvišča abo inšych dadzienych hramadzianina, zajava ab źnižeńni šlubnaha ŭzrostu (kali ŭzrost hramadzianina mienš za 18 hadoŭ), miedycynskaja daviedka pra ciažarnaść, zajava na skaračeńnie terminu rehistracyi šlubu z ukazańniem pryčyny.
Nie zabyvajcie, što za niekalki dzion da śviatočnaha mierapryjemstva (vam pra heta skažuć u dzień padačy zajavy) nieabchodna budzie prynieści ŭ ZAHS pašparty, kab pastavić u ich adpaviednyja štampy.
Na što źviarnuć uvahu?
Kali adzin z vas — zamiežny hramadzianin
Kab pabracca šlubam u našaj krainie, zamiežny hramadzianin pavinien pradastavić:
- pašpart;
- daviedku pra siamiejnaje stanovišča (nie žanaty, nie zamužam), pryviezienuju sa svajoj radzimy abo ź dźviuch krain, kali zamiežnik źjaŭlajecca hramadzianinam dźviuch dziaržaŭ;
- dakumient-paćviardžeńnie rehistracyi ŭ Biełarusi, jakaja musić dziejničać na momant zaklučeńnia šlubu.
Usie dakumienty pavinny być pierakładzienyja i nataryjalna zavieranyja biełaruskimi jurystami. Tolki paśla ŭsich pracedur z hetymi dakumientami možna iści ŭ ZAHS.
Pra padaču zajavy adnym z pary
Padać u ZAHS zapoŭnienuju i padpisanuju doma zajavu moža i niechta adzin. Ale tolki kali na toje jość važkija pryčyny (ciažkaja chvaroba, vajskovaja słužba, addalenaść miesca žycharstva i inšaje). U hetym vypadku hramadzianin, jaki nie budzie prysutničać, maje papiarednie zaśviedčyć svoj podpis u supracoŭnika ZAHSa abo nataryusa.
Proźvišča
Pierad padačaj zajavy nieabchodna vyrašyć pytańnie z budučym proźviščam. Farmalna isnuje try varyjanty: pakinuć svajo proźvišča, uziać proźvišča muža/žonki ci abjadnać ich. Uličycie, što paśla źmieny proźvišča ŭsie staryja dakumienty (pašpart, pracoŭnaja knižka, strachoŭka, paśviedčańnie kiroŭcy, dakumienty na nieruchomaść i h.d.) buduć ličycca sapraŭdnymi tolki adzin miesiac. Nieabchodna ich pieraaformić.
Darečy, padača zajavy ŭ ZAHS ličycca aficyjnymi zaručynami. Tamu nie zabudźcie adśviatkavać hetuju važnuju padzieju!
