Saliharčanin źniaŭ dakumientalny film pra seksizm i «patryjarchalnuju dzič» u biełaruskim futbole
Žurnalist Jahor Kaleśnik płanavaŭ anansavać vychad svajoj aŭtarskaj stužki «Hulaje jak dziaŭčynka» ŭ žniŭni, ale apošnija padziei, źviazanyja z vykazvańniami hienieralnaha sakratara Biełaruskaj fiederacyi futboła Juryja Viarhiejčyka pra toje, što futboł — nie žanočaja sprava, zmusili jaho zrabić heta chutčej.
«Ja — svabodny žurnalist, pracuju jak IP i daŭno płanavaŭ uziacca za dakumientalnyja filmy DIY. Kala piaci hod taksama pracuju futbolnym kamientataram i naziraju, jak hublajecca cikaŭnaść da biełaruskaha «mužčynskaha» futboła. U žanočym ža ŭvohule situacyja vielmi sumnaja. «Letaś ja pačaŭ ščylna daśledavać roznyja vidy dyskryminacyi ŭ suśvietnym futbole, a paśla vyrašyŭ raspavieści, jak z hetym iduć spravy ŭ nas», — raskazvaje Jahor.
Jahor Kaleśnik.
Źniać dakumientalnaje kino Jahora dadatkova matyvavała ahulnaja situacyja ź biełaruskim videakantentam: «Ja ŭsio mienš sustrakaju jakasnych rolikaŭ, jakija prymušajuć dumać, pieražyvać, mianiacca da lepšaha. Zatoje ŭsio bolš baču takija, dzie błohiery abmotvajuć adzin adnaho charčovaj plonkaj. Heta prymušaje dziejničać samomu».
Režysior, apieratar i inžynier pa mantažu ŭ adnoj asobie dadaje, što choć asnoŭnaja tema stužki — dyskryminacyja ŭ dačynieńni da futbalistak, u filmie šmat hierojaŭ-mužčyn. Siarod ich — hramadzianskija aktyvisty, dziciačy trenier, arbitr, hałoŭny trenier «Isłačy» Vital Žukoŭski. Asobnaj linijaj idzie raskaz pra prajekt «Zdolnaja» i jaho zasnavalnicu Hannu Bandarenka, jakaja pravodzić treniroŭki pa «niežanočych» vidach sportu.
Pakul u siecivie dastupny tolki tyzier budučaj paŭhadzinnaj stužki. Całkam pahladzieć film, pa słovach Jahora, možna budzie ŭžo ŭ hetym miesiacy. Ale kankretnuju datu jon pakul nie nazyvaje: pierš, čym vykładać materyjał u adkryty dostup, chłopiec pasprabuje jaho kamu-niebudź pradać.