Zatrymanych u Dzień niezaležnaści hrodzienskich aktyvistaŭ abvinavačvajuć u niesankcyjanavanym mitynhu
Alaksandr Łaŭrenćjeŭ zaraz znachodzicca ŭ izalatary Kastryčnickaha RAUSa, raskazaŭ aktyvist BCHD Siarhiej Vieramiejenka. Ich buduć sudzić pa artykule 23.34 — Parušeńnie paradku arhanizacyi abo praviadzieńnia masavych mierapryjemstvaŭ. Siabry aktyvistaŭ, jakija prysutničali pry zatrymańni, napisali zajavy, kab ich pryciahnuli ŭ jakaści śviedkaŭ. Mikałaj Salanik znachodzicca ŭ kardyjałahičnym adździaleńni i adčuvaje siabie lepš.
Nahadajem, 3 lipienia dva aktyvisty Abjadnanaj hramadzianskaj partyi chacieli pravieści akcyju-pierformans na śviatkavańni Dnia niezaležnaści. Ich pa administracyjnaj spravie zatrymali AMAPaŭcy, jakija nie pradstavilisia. Jany dastavili Alaksandra Łaŭrenćjeva i Mikałaja Salanika ŭ RAUS Kastryčnickaha rajonu. Adtul Mikałaja z hipiertaničnym kryzam dastavili na chutkaj u balnicu.
Alaksandr dahetul znachodzicca ŭ izalatary Kastryčnickaha RAUSa. Spravu Łaŭrenćjeva pavinny byli pieradać u Sud Kastryčnickaha rajona ŭ 14.00. A jaje nie było tam ni ŭ 14.00, ni ŭ 14.30. Śviedki zatrymańnia chočuć pradjavić na sudzie videadokazy taho, što zatrymlivali aktyvistaŭ ludzi ŭ štackim, jakija nie pradstaŭlalisia.
«Što jany ličyć za niesankcyjanavany mitynh? Što ja išoŭ u pałasataj robie ź siabram da svajho samachodu? Moža, ja i dumaŭ pra mitynh, ale ja nie ŭdzielničaŭ i nie rabiŭ jaho», — kaža Mikałaj.
Mikałaj Salanik kaža, što adčuvaje siabie lepš: «Balać trochu kości, ale fizičny bol — heta ciarpima.Pamiali baki AMAPaŭcy, pierachvalavaŭsia. Uračy lečać, dapamahajuć vyjści z hetaha stanu». Jon budzie ŭ špitali jašče vosiem-dziesiać dzion. Učora ŭ balnicy dziažuryli supracoŭniki RAUSa. Siońnia «adviedać» jaho pryjści milicyjanty. Mikałaj napisaŭ zajavu ab pabojach i zaŭtra addaść jaje sudmiedekśpiertu.
