Pasoł Biełarusi ŭ Rasii: Amierykanskaja dyvizija ŭ Polščy Biełarusi nie pahražaje, raźmiaščeńnie rasijskaj bazy nieaktualnaje
Namier Polščy raźmiaścić na svajoj terytoryi braniatankavuju dyviziju ZŠA niepasredna nie pahražaje Biełarusi, ale pavyšaje ŭzrovień vajennaj niebiaśpieki ŭ rehijonie, zajaviŭ u intervju RIA Novosti pasoł Biełarusi ŭ Rasii Ihar Pietryšenka. Taksama pasoł zajaviŭ, što tema rasijskaj bazy ŭ Biełarusi na siońnia nie aktualnaja.
Ihar Pietryšenka.
Raniej Polšča prapanavała ZŠA raźmiaścić u siabie amierykanskuju braniatankavuju dyviziju.
«Dadzienaja miera niepasredna nie pahražaje Biełarusi, ale jak lubaja vajskovaja aktyŭnaść kala našych miežaŭ i pavieličeńnie kolkaści vajskovych kantynhientaŭ pavyšaje ŭzrovień vajennaj niebiaśpieki. Biezumoŭna, my ŭličvajem hety faktar i ŭ nacyjanalnym vajennym budaŭnictvie, i ŭ vajennym supracoŭnictvie ŭ farmatach Sajuznaj dziaržavy i ADKB», — zajaviŭ Pietryšenka.
Dypłamat dadaŭ, što raźmiaščeńnie na svajoj terytoryi vojskaŭ trecich krain — «heta prava suvierennaj dziaržavy».
«Tema pa rasijskaj bazie (u Biełarusi — red.) syšła, i jana nie aktualizavałasia», — skazaŭ jon.
U kastryčniku 2015 hoda Łukašenka zajaviŭ, što raźmiaščeńnie rasijskaj vajskovaj avijabazy z vajskovaha punktu hledžańnia nie treba ni Minsku, ni Maskvie, i nazvaŭ «šumichu» u ŚMI vakoł hetaj temy palityčnaj. U 2016 hodzie kiraŭnik MZS Biełarusi Uładzimir Makiej zajaviŭ, što biełaruskaja pazicyja z nahody raźmiaščeńnia na terytoryi Biełarusi rasijskaj avijabazy nie źmianiłasia.