Ułaśnik restarana ŭ Kurapatach prapanuje hramadskaści niekalki kampramisnych varyjantaŭ
Ryhor Kastusioŭ (źleva) i Juraś Ziankovič (sprava) na pikiecie suprać adkryćcia restarana la Kurapataŭ, 14 červienia 2018
Lidar partyi BNF Ryhor Kastusioŭ i siabar partyi, amierykanski advakat Juraś Ziankovič dasiahnuli «pryncypovaj damoŭlenaści» ab praviadzieńni sustrečy ŭsich zacikaŭlenych bakoŭ dla dasiahnieńnia kampramisu adnosna kanfliktu vakoł restarana «Pajedziem, pajadzim», što za 50 metraŭ ad memaryjału achviaraŭ stalinskich represij u Kurapatach. Pra heta Kastusioŭ i Ziankovič skazali Radyjo Svaboda.
U sustrečy, pavodle ich, voźmuć udzieł jak pradstaŭniki hramadzkaści, uładaŭ i bujnoha biznesu, tak i ŭładalniki restaranu.
«Nam daviałosia pravieści niekalki praduktyŭnych sustreč z adnym z uładalnikaŭ restaranu Leanidam Zajdesam. Jon akazaŭsia vielmi adkrytym da razmovy i kanstruktyvu čałaviekam. Ciaham pieramovaŭ nam udałosia dasiahnuć uzajemaparazumieńnia i pryjści da vysnovy, što prablemu mahčyma vyrašyć tolki ŭ sumiesnaj supracy, — skazaŭ Ziankovič. — Sustreča adbudziecca 29 červienia abo na terytoryi restarana, abo na niejtralnaj placoŭcy».
Pa słovach pradstaŭnikoŭ partyi BNF, papiarednie ŭzhodniena, što na sustreču buduć zaprošanyja čynoŭniki Mienharvykankamu, Mienabłvykankamu, Minkultury, dyplamaty, abaroncy Kurapataŭ, Tavarystva achovy pomnikaŭ, deputaty Pałaty pradstaŭnikoŭ Anisim, Kanapackaja i Marzaluk, biznesmeny Jury Ziser i Viktar Prakapienia.
Kastusioŭ i Ziankovič śćviardžajuć, što ŭ abmierkavańni buduć udzielničać i tyja, chto pratestuje suprać restaranu. Prajaŭlajuć zacikaŭlenaść i pradstaŭniki niekatorych bujnych habrejskich arhanizacyj, jakija «abaviazkova buduć zaprošanyja na pieramovy».
«Padčas pieramovaŭ uładalnik restaracyi prapanuje niekalki varyjantaŭ, kožny ź jakich moža być padtrymany hramadzkaściu. Naprykład, vykup terytoryi za mienšy, čym balansavy, košt, ci praviadzieńnie vialikaj pracy pa ŭładkavańni Kurapataŭ i ŭstalavańni papiarednie raspracavanaha memaryjalnaha kompleksu, — skazali Svabodzie Kastusioŭ dy Ziankovič. — Taksama spadar Zajdes pradstavić šmat dakumentaŭ-prapanovaŭ, ź jakimi jon źviartaŭsia da Minkultu za apošnija 5—6 hod z metaj raspracoŭki kompleksu i atrymaŭ šmatlikija admovy».
Surazmoŭcy padkreślivajuć, što ŭsie, «chto maje prapanovy, buduć siadzieć za kruhłym stałom».
