Lenta.ru: Kulturnaja palityka biełaruskich uład prymušaje biełarusaŭ brać zbroju ŭ ruki i zmahacca va Ukrainie suprać «ruskaha śvietu»
Papularnaje rasijskaje vydańnie Lenta.ru napisała materyjał pra biełaruskich dobraachvotnikaŭ, jakija vajujuć na ŭschodzie Ukrainy jak na baku ukrainskaj dziaržavy, tak i na baku tak zvanych «narodnych respublik».
Fota: Siarhiej Hryc, AP.
Rasijskaje vydańnie piša, što aktyŭny ŭdzieł biełarusaŭ va ŭzbrojenym kanflikcie pačaŭsia ź viasny 2014 hoda, ale faktyčna biełarusy byli aktyŭnymi ŭdzielnikami ŭkrainskich padziej jašče z časoŭ Majdana. U jakaści prykładu takoha ŭdzieła biełarusaŭ rasijski žurnalist uzhadvaje Michaiła Žyźnieŭskaha.
Ale sapraŭdy masavy prytok biełarusaŭ pačaŭsia ŭviesnu 2014 hoda, kali na ŭschodzie Ukrainy pačalisia vajskovyja dziejańni.
Lenta.ru uzhadvaje słovy pradstaŭnika MUS Biełarusi Mikałaja Karpiankova, jaki kazaŭ pra 734 hramadzian Biełarusi, jakija praviarajucca na najmictva.
Rasijskaje vydańnie pryznaje, što vajujuć biełarusy i na baku tak zvanych «narodnych respublik», i navat u bolšaj kolkaści, čym na baku Ukrainy. Ale biełarusy, jakija vajujuć na baku Ukrainy, bolš publičnyja i adkrytyja, tamu pra ich dziejnaść bolš viadoma ŚMI i hramadstvu. Heta aŭtary tłumačać tym, što ŭsie dobraachvotniki bajacca prablem ź biełaruskim zakonam, ale kali dobraachvotniki na baku tak zvanych «dnr» i «łnr» u pierśpiektyvie źbirajucca viartacca ŭ Biełarusi, to dobraachvotniki ŭkrainskich uzbrojenych struktur śviadoma nie źbirajucca viartacca ŭ Biełaruś u bližejšy čas, tamu jany i nie bajacca śviacicca ŭ miedyja.
Da taho ž, biełaruskija dobraachvotniki ŭ składzie ŭzbrojenych sił Ukrainy ŭsialak akcentujuć i padkreślivajuć svaju biełaruskaść, u toj čas jak bajeviki tak zvanych «dnr» i «łnr» adčuvajuć siabie chutčej častkaj «ruskaha śvietu». Prarasijskija dobraachvotniki ź Biełarusi nie majuć ułasnaj simvoliki, nie hurtujucca pa nacyjanalnaj prykmiecie i prosta imknucca nie «śviacicca» ŭ miedyja.
«Z-za hetaha ŭ zvyčajnaha naziralnika moža skłaścisia ŭjaŭleńnie, što ŭradžency Biełarusi ŭ hetaj vajnie zmahajucca pieravažna na baku Ukrainy»,
— piša Lenta.ru.
Rasijskaje vydańnie piša, što asnoŭnaja matyvacyja tych, chto vajuje na baku Ukrainy — baraćba z rasijskaj ahresijaj na dalokich podstupach, tamu što kali Rasiju nie spynić va Ukrainie, jana rana ci pozna zachopić i Biełaruś.
«Za 20 hadoŭ, nie biez udziełu dziaržaŭnaj prapahandy, u Biełarusi vyrasła cełaje pakaleńnie, asobnyja pradstaŭniki jakoha bačać sens žyćcia ŭ baraćbie z Ruskim śvietam i rasijskaj pahrozaj. Pryčym, sa zbrojaj u rukach»,
— piša Lenta.ru.
Taksama rasijskaje vydańnie źviartaje ŭvahu na roźnicu ŭ padychodach pravaachoŭnaj sistemy da dobraachvotnikaŭ. Kali ŭdzielnikaŭ bandfarmavańniaŭ na baku tak zvanych «dnr» i «łnr» sudziać za najmictva, to praŭkrainskich biełarusaŭ-dobraachvotnikaŭ sudziać pa inšych artykułach. Heta źviazana z tym, što biełaruskija dobraachvotniki ŭ składzie ŭzbrojenych sił Ukrainy farmalna nie źjaŭlajucca dobraachvotnikami i majuć aficyjny status, u adroźnieńnie ad biełarusaŭ, jakija vajujuć za tak zvanyja «narodnyja respubliki».
«I niama asablivych sumnieńniaŭ u tym, što represii suprać biełaruskich bajcoŭ praciahnucca: zajavy pradstaŭnikoŭ aficyjnaha Minska vidavočna pra heta kažuć»,
— upeŭniena rasijskaje vydańnie.
Lenta.ru miarkuje, što, kali Łukašenka kazaŭ pra nieabchodnaść źniščeńnia bajevikoŭ, jakija vajujuć suprać ukraincaŭ, jon rabiŭ heta absalutna ščyra, tamu što kiraŭnik Biełarusi nie zacikaŭleny ŭ paražeńni Ukrainy.
«Padzieńnie ŭkrainskaj dziaržaŭnaści ŭsprymajecca biełaruskim lidaram jak vialikaja pahroza ŭsiamu postsavieckamu śvietaparadku, u ramkach jakoha Łukašenka amal čverć stahodździa zachoŭvaje samadziaržaŭnickuju ŭładu»,
— piša Lenta.ru.
Rasijskaje vydańnie ŭpeŭnienaje, što cisk na biełaruskich «apałčencaŭ Danbasa» budzie praciahvacca, bo jany — vorahi jak dziaržavy, tak i apazicyjnaj častki hramadstva.
Lenta.ru ličyć, što heta źjaŭlajecca vynikam kulturnaj palityki biełaruskich uład, jakija nibyta kultyvujuć nacyjanalizm:
«U Biełarusi istotna prybaviłasia ludziej, jakija hatovyja brać u ruki zbroju i jechać za miažu, kab spynić ruski śviet na dalokich podstupach. I možna nie sumniavacca, što pry zachavańni ciapierašnich tendencyj u dziaržaŭnaj ideałohii, ich kolkaść budzie tolki pavialičvacca».
