U Kanadzie lehalizavali ŭžyvańnie marychuany
AFP
U Kanadzie pryniaty zakon, jaki dazvalaje ŭžyvańnie marychuany na ŭsioj terytoryi krainy.
Dakumient rehuluje, jak možna vyroščvać kanabis, dzie i jakimi sposabami raspaŭsiudžvać, a taksama jak pavinien być arhanizavany prodaž. Sienatary ŭchvalili zakonaprajekt prostaj bolšaściu hałasoŭ: 52 suprać 29.
Žychary krainy zmohuć pačać zakonna nabyvać i ŭžyvać marychuanu ŭžo ŭ vieraśni.
Kanada stała pieršaj krainaj «Vialikaj siamiorki», što lehalizavała ŭžyvańnie kanabisu ŭ rekreacyjnych metach.
Zachoŭvańnie marychuany ŭ krainie zabaranili ŭ 1923 hodzie, ale ŭ 2001 było lehalizavana jaje miedycynskaje ŭžyvańnie.
Paśla padpisańnia zakona ŭrad krainy pavinien budzie vyznačyć datu jaho ŭstupleńnia ŭ siłu.
Pavodle słoŭ premjer-ministra krainy Džaścina Trudo, da siońniašniaha dnia «našym dzieciam było zanadta prosta dastać marychuanu, a złačyncam — nažyvacca na joj».
Miascovym i rehijanalnym uładam budzie dadziena 8—12 tydniaŭ na toje, kab vyznačać praviły i ŭmovy prodažu kanabisu na svajoj terytoryi, a palicyi — kab padrychtavacca da pracy ŭ novych umovach.
Pavodle padlikaŭ, u 2015 hodzie kanadcy patracili na marychuanu kala 6 młrd kanadskich dalaraŭ (4,5 młrd dalaraŭ ZŠA) — prykładna stolki ž, kolki žychary krainy patracili na vino.
Da siaredziny vieraśnia kanadcy atrymajuć mahčymaść lehalna nabyvać kanabis i kanabisavy alej, vyrablenyja licenzavanymi pastaŭščykami, u roznych kramach.
Akramia taho, marychuanu možna budzie zakazvać anłajn — taksama ad licenzavanych vytvorcaŭ.
Darosłym hramadzianam budzie dazvolena mieć pry sabie da 30 hramaŭ vysušanaj marychuany.
Apytanka
