Chto taki Arciom Dziuba?
U druhim matčy zapar na čempijanacie śvietu pa futbole ŭ zbornaj Rasii adznačajecca Arciom Dziuba. Amal dvuchmietrovy (196 sm) napadajučy paśla zabitych miačoŭ «addavaŭ čeść» trenieru i trybunam. Chto ž taki hety Dziuba?
Proźvišča Arciom atrymaŭ ad baćki-ŭkrainca. Pišacca proźvišča pa-rusku, darečy, praz «dz». (Dziuba pa-ŭkrainsku aznačaje toje samaje, što i pa-biełarusku.) Baćka rodam z Pałtaŭskaj vobłaści. U inšaha abaroncy zbornaj Rasii, Siarhieja Ihnaševiča, baćka byŭ z našaha Salihorskaha rajona, ale ŭsich ich ciahnuła ŭ Maskvu.
Baćka Arcioma pracavaŭ milicyjanieram, maci — mahazinščycaj. Siamja doŭha žyła ŭ kamunałcy, pakul nie atrymała ŭłasnuju kvateru.
Dziuba zajmaŭsia futbołam u škole maskoŭskaha «Spartaka». Pravioŭ za kamandu niekalki siezonaŭ, ale nie pryžyŭsia. «Čyrvona-biełyja» addali jaho ŭ «Tom». Mienavita tam, u «sibirskich Afinach», jak nazyvaŭ Tomsk Anton Čechaŭ, i zahartavaŭsia charaktar Dziuby. Tam da jaho pryjšła słava bambardzira.
Arciom potym jašče viartaŭsia ŭ «Spartak», ale niaŭdała, kamanda znoŭ addała jaho na pieryfieryju — u «Rastoŭ». I tam u Dziuby ŭsio išło vydatna. U 2015 hodzie Arciom zaklučaje kantrakt ź picierskim «Zienitam». Usie dobryja rasijskija hulcy rana ci pozna apynajucca tam. Stolki hrošaj, jak u piciercaŭ, niama ni ŭ kaho bolš.
Za svaju karjeru Dziuba zabiŭ bolš za sto hałoŭ. Niekali jon uraziŭ usich svaimi słovami: «Miesi i Kryšcijanu Ranałdu b nie zabili ŭ čempijanacie Rasii bolš za 20 hałoŭ». Za hetyja słovy Dziubu abśmiejvali.
U vialikim rasijskim kłubie ŭ Dziuby znoŭ nie atrymałasia. I «Zienit» addaŭ forvarda ŭ tulski «Arsienał». Hulać suprać «Zienita» jon nie mieŭ prava. U damovie była praduhledžana takaja mahčymaść, praŭda, pry ŭmovie, što hulec zapłacić štraf u pamiery 120 tysiač jeŭra. U apošni momant Dziuba pieradumaŭ.
Zrešty, hrošaj na hulniu forvardu sabrali. Pałovu daŭ kłub, a pałovu vobłaść. Dziuba adhulaŭ adzin z najlepšych matčaŭ za «Arsienał». Zabiŭ hoł, addaŭ pieradaču. Tym samym jon faktyčna całkam pazbaviŭ «Zienit» šancaŭ na Lihu čempijonaŭ. Piciercy tudy tak i nie trapili.
A fanaty «Zienita» ŭ toj hulni razharnuli płakat: «Dziuba, chaj budzie siła ducha, jak u Vini-Pucha». Heta cytata ź pieśni «Leninhrada» «Šlucha». Paśla čempijanatu śvietu Dziubie viartacca ŭ Sankt-Pieciarburh.
Dziuba žanaty. Ale rasijskaja žoŭtaja presa šmat apisvała jahonyja ramantyčnyja adnosiny z televiadučaj Maryjaj Arzuł. Voś takaja hałoŭnaja zorka rasijskaj kamandy na hetym mundyjali.
Kali sočycie za čempijanatam śvietu pa futbole, raim vam zrabić staŭku ŭ Bukmiekierskaj kantory Marafon!
