Udaryła 20 razoŭ: maci z Radaškovičaŭ, jakaja biła dačku i syna ramianiom, aštrafavali, ale dziaciej nie viarnuli
Sud Maładziečanskaha rajona aštrafavaŭ maci z Radaškovičaŭ, u jakoj zabrali dzieviać dziaciej. Žančynu abvinavacili ŭ tym, što jana biła starejšych dziaciej ramianiom, piša Tut.by.
Šmatdzietnuju maci sudzili za toje, što pakarała dziaciej 19 i 20 sakavika.
Na sud pryjšli paciarpiełyja dzieci, školny psichołah, a taksama dyrektar Radaškovickaj škoły-internata, dzie ciapier znachodziacca šaściora dziaciej ź dzieviaci. Troje małodšych ciapier u pryjomnaj siamji, u svajakoŭ baćkoŭ.
Ustanoŭlena, što pozna ŭviečary 19 sakavika maci ŭdaryła dačku ramianiom pa jahadzicach kala dziesiaci razoŭ. U sudzie jana pryznała — takoje było.
— Pakarała dačku ramianiom. Joj było kankretna skazana schadzić u kramu i viarnucca. Krama niedaloka, a pakul jana viarnułasia, prajšło hadziny paŭtary. Ja stała vyśviatlać, dzie jana była — u adkaz jana pačała manić.
Dačka daručeńnie vykanała, pradukty kupiła, a karali jaje mienavita za toje, što doŭha chadziła ŭ kramu. Maci patłumačyła sudździ: ličyć, pravilna zrabiła, što pakarała.
20 sakavika maci znajšła ŭ syna kavałak spalenaj haziety. Jaho taksama kala 10 razoŭ udaryli ramianiom.
Sud pryznaŭ šmatdzietnuju mamu vinavataj u pravaparušeńni pa č 1 art 91 KaAP. Jana pavinna vypłacić štraf 15 bazavych vieličyniaŭ (360 rubloŭ 50 kapiejek). Paśla suda, la ŭvachodu, dzieci i mama piaščotna abdymalisia na raźvitańnie.
Dzieci sa šmatdzietnaj siamji ciapier u statusie tych, chto zastaŭsia biez apieki baćkoŭ. Baćki pravoŭ nie pazbaŭlenyja, u ich jość paŭhoda na toje, kab vypravicca. U žniŭni kamisija pa spravach niepaŭnaletnich pavinna vyrašyć, ci viernucca dzieci da baćkoŭ.
